Приказната почнува во 1905 година. Дедото на Доналд Трамп бил избркан од неговата татковина Германија и приморан да се отсели во САД.
Една административна одлука од тоа време вчера беше објавена во германскиот медиум Билд. Роланд Пол, германски историчар, во германските архиви го пронајде писмото во кое локалната администрација му наложува на Фридрих Трамп да ја напушти Германија.
Фридрих Трамп бил роден во 1869 година во Германија. Тој ја напушта својата земја и оди во Америка во 1885 година, на 16 годишна возраст, со надеж дека таму ќе успее да се збогати. Според британскиот Гардијан, тој отворил ресторан за трагачите по злато во Аљаска. Муштериите понекогаш ги плаќале своите оброци со трошки злато.
Но, во текот на една посета во родниот град во 1901 година, Фридрих се вљубува во Германката Елизабет Крист и се жени со неа една година подоцна. Елизабет е носталгична и сака да се врати во Германија. Така Фридрих решава, заедно со семејството, да се врати во родниот град Калштад во тогашното Кралство Баварска.
Фридрих Трамп со сопругата Елизабет
Германија тоа не му го дозволила: “Американскиот граѓанин Фридрих Трамп, со живеалиште во Калштад, мора да ја напушти територијата на Баварска најдоцна на 1 мај. Во спротивно ќе биде депортиран”, пишува во писмото испратено на 1 февруари 1905 година.
Фридрих и Елизабет со синовите Фред (татко на Доналд) и Џон и ќерката Елизабет
Кога првиот пат ја напуштил Германија, дедото Трамп не ги извршил тогашните обврски кон државата кои би го ослободиле од служење на воениот рок. Администрацијата заклучила дека Фридрих Трамп избегал од воениот рок и обврските што тоа ги наметнува.
Дедото Трамп се обидува да остане во Германија. И му пишува писмо, на 27 февруари 1905 година, на принцот регент Луитполд. Во писмото тој му се умилкува и му се обраќа со “многу сакан, благороден, мудар, праведен и возвишен владетел”.
Но принцот ја одбива жалбата и Трамп со семејството ја напушта Германија на 1 јули 1905 година на параходот Пенсилванија. Елизабет е бремена и таткото на Доналд, Фред, се раѓа неколку месеци подоцна во Њујорк.