Како да се подобри односот на лекарите со пациентите со комуникациски вештини со хроничните болни и тие со карцином, како и со психијатриските пациенти и нивните семејства. За таа цел, Лекарската комора покани експерт, искусен професор од Германија Уве Гилер кој како предавач на оваа тема ќе зборува пред македонските лекари на Медицинскиот факултет во Скопје, денес и во наредните два дена.
„Ова е предавање за подобрување на комуникациските вештини меѓу докторите и пациентите, меѓу докторот и семејството на пациентот. Наша беше идејата да ги викнеме и здруженијата на пациенти и докторите, да видиме што ни недостасува, како може еден експерт да помогне за да видиме како тој однос да се подобри, изјави за НОВА, доц.др. Калина Гривчева Старделова, претседател на Лекарската комора.
Калина Гривчева Старделова, претседател на Лекарска комора
Во Македонија чести се инцидентите каде што револтирани пациенти или нивните семејства се агресивни, а пристапот на дел од медицинскиот персонал некогаш не соодвествува. Само во последната година во МВР се пријавени над десетина случаи на напади врз доктори и медицински сестри.
Во јавноста се познати случаите кога доктор во тетовската болница беше претепан од семејство на пациент, нападот врз доктор во болницата во Кичево, врз медицинска сестра во поликлиниката во Драчево, на Ургентниот центар и Клиниката за неврологија, како и во двете градски болници. Многу од случаите, особено вербалните не се пријавени.
Професорот Гилер вели дека во Германија континуирано се прават обуки и разни предавања кои даваат солидни резултати.
„Имаме предавања и обуки преку работилници да се подобри таа комуникација, да му се овозможи на пациентот да учествува во донесувањето на одлуките. Со помош на тие обуки успеавме да создадеме пријателски однос со пациентите за полесно да се совладаат моментите на криза“, изјави за НОВА, професорот Уве Гилер.
Во Германија еден лекар беше убиен од психијатриски пациент, а само во последната година регистрирани се стотина случаи на напади врз доктори од пациенти или членови на нивните семејства, потенцира професорот Гилер.
Проблемот е глобален и затоа современиот свет работи на негово решавање. Во Германија студентите на медицина уште во првите години на факултет изучуваат комуникациски вештини за односот со пациентите. Во нашата држава таков предмет на Медицинскиот факултет не постои.
