Во Грција со неизвесност се следеше предизборната кампања за парламентарните избори во Германија. Грците стравуваат дека победата на Меркел за нив ќе значи нови мерки за штедење, пишува Дојче веле на македонски.
Граѓаните на Грција, која е неколку години во криза, се плашат дека реизборот на конзервативната канцеларка ќе им донесе уште повеќе штедење и страдања.
Повеќето од експертите се согласуваат со ваквиот став. Тие велат дека доколку Меркел биде реизбрана, таа ќе ја засили својата агенда на кратење на долговите, а постојат мали шанси дека ќе покаже попустливост за еврозоната.
Расправата за можен трет или или и четврти пакет за спасување, со цел да се затвори буџетската дупка во Грција, играше голема улога во изборната кампања во Германија. Меркел изјави дека Грција не ни требало да биде примена во еврозоната. Во последниве неколку години, како заеми за помош за спасување од банкрот, Грција доби 250 милијарди евра. Се стравува дека сега, Германија која е најголемиот поединечен позајмувач, размислува да си ги „измие рацете“ од јужната медитеранска земја.
„Мислам дека многумина во Германија сега сфатија дека Грција не е ниту близу до средување на своите економски проблеми и дека работиве не можат да продолжат вака“, вели еден политичар од коалициската влада на Грција, предводена од конзервативците.
„Порано или подоцна, Германците ќе речат дека ќе нема повеќе пакети за спас, време е вие да ја напуштите еврозоната“, вели еден грчки политичар кој сака да остане анонимен.
Во дипломатските кругови постојат големи надежи дека проблемите на земјата со долговите ќе бидат решени по германските избори, имено со нивно отпишување.
Димитрис Друцас, грчки европратеник, вели дека Грција станала жртва на германската изборна кампања.
„Многу е јасно дека нешто повеќе мора да биде направено во Грција, имено многу дарежливо и храбро ’потстрижување’ на долгот. Грчкиот долг е толку голем што секогаш ќе биде товар и доколку тоа не се случи, никогаш нема да излеземе од кризата. За германскиот електорат, оваа вест не е убава, политичарите мораат да бидат јасни и искрени и да кажат дека тоа ќе значи губење на пари на даночните обрзници“, додава тој.