Германскиот канцелар Олаф Шолц го разреши министерот за финансии Кристијан Линднер бидејќи, како што објасни, повеќе и служел на својата партија отколку на општото добро на државата. На овој начин практично престана да постои коалицијата од три партии која во моментов е на власт во Германија.
Го ослободив Линднер од неговите должности. Овој потег беше неопходен за да се обезбеди безбедноста на нашата земја. Ни треба повеќе финансиски простор за маневрирање низ предизвиците. Министерот Линднер не покажа подготвеност да спроведе ниту еден од нашите предлози. На нашите компании им треба поддршка, веднаш. Секој кој одбива се однесува неодговорно – рече Олаф Шолц канцеларот на Германија.
Доцна вечерта по говорот на канцеларот, шефот на пратеничката група на ФДП, Кристијан Дир, официјално објави дека сите четворица министри од таа партија ќе се повлечат. Покрај министерот за финансии Линднер, таму се и министерот за транспорт Фолкер Висинг, министерот за правда Марко Бушман и министерката за образование Бетина Старк-Ватцингер.
На овој чекор Шолц истакна дека секој кој и се придружил на Владата мора да делува одговорно, а не да бега во засолниште кога работите стануваат тешки.
Германскиот канцелар изјави дека нема основа за доверба за каква било соработка со Линднер, член на партијата Слободни демократи.
Лидерот на опозицијата Фридрих Мерц, од Христијанско-демократската унија – ЦДУ, изјави дека канцеларот Шолц мора веднаш да побара гласање за доверба на неговата влада во парламентот и да не се чека до 15 јануари, кога се очекува мнозинството пратеници да бидат против продолжување на мандатот.
Коалицијата повеќе нема мнозинство во германскиот Бундестаг и затоа апелираме до канцеларот веднаш да побара гласање доверба, најдоцна до почетокот на следната недела, рече Фридрих Мерц лидер на ЦДУ.
Германската Слободна демократска партија објави дека ги повлекува сите свои министри од германската федерална влада, откако канцеларот Шолц го разреши министерот за финансии и лидер на партијата, Кристијан Линднер, оставајќи ја владата со 324 пратеници, 44 помалку од потребното мнозинство со што се распадна тројната коалиција. Шолц го назначи Јерг Кукиес, неговиот поранешен економски советник, за наследник на разрешениот министер за финансии, Кристијан Линднер.
Првата трипартитна коалиција во историјата на Германија западна во турбуленции уште лани и тоа веќе не можеше да се стабилизира. Уставниот суд делови од буџетот на владата во Берлин ги оцени како неуставни.
Тоа е денот кога на коалицијата од СПД, Зелените и Либералите ѝ беше одземена финансиската основа за работа. Конкретно станува збор за околу 60 милијарди евра, чија употреба беше забранета од страна на највисокиот германски суд.