Се поизвесен е банкротот на Грција. Во ова сценарио сега веруваат и најголемите економски оптимисти. Милијардите евра на Германците, а потоа и на Французите и Италијанците тешко дека доверителите повторно ќе ги видат, а изјавите на грчкиот министер за финансии, исто така, не одат во нивни прилог.
„Германците дадоа веќе премногу пари. Но, тие се загубени, тие исчезнаа во црна дупка“, изјави Варуфакис за „Тагесшпигел“, оваа изјава денеска во коментар ја пренесува и „Дојче Веле“.
На ова се надоврзува и сценариот за излез од еврозоната. Германските аналитичари сметаат дека ова сценарио повеќе би имало идеолошки, односно политички последици отколку економски.
„При излез на Грција од еврозоната (грексит), последиците по финансиските институции, со оглед на ниските суми, ќе бидат ограничени, пишува аналитичарот Кијан Абухусеин. Но она од што унијата стравува е опасноста од тн. ефект на зараза односно прелевање во земјите како Италија. Исто така, ЕУ стравува и од потенцијалната ранливност на Грција кон руското влијание во случај на напуштање на еврозоната.
Расположението на германските граѓани не им од во прилог на оние кои сметаат дека политичките мотиви треба да се клучни во сочувувањето на Грција во еврозоната. Анкета на телевизија ЗДФ објавена во петокот обзнани дека се повеќе Германци го губат трпението и сакаат да ја видат Грција надвор од еврозоната.
Анкетата која ја изработи Политбарометар покажа драматичен пресврт во расположението. Ако во јануари една третина од Германците сакаат да ја видат Грција надвор од еврозоната, во јуни тоа се 51 процент од граѓаните, додека дури 70 проценти се противат Германија и унијата да прават уште отстапки за Грција.