Поддржани од граѓанската асоцијација „Фото-глас“, граѓаните од Гевгелија по утврденото присуство на арсен во водата со 14,8 отсто микрограми (надминувајќи ја границата од 10 отсто пропишана од СЗО), преку симболичен настан денеска се обидоа да ја поткренат свеста кај надлежните, промовирајќи вода „Арсена“ од гевгелиските чешми во центарот на градот Скопје.
Според граѓаните и активистите, општинските власти ги кријат реалните податоци и го прикриваат проблемот затоа што на Општината, сметаат, не и оди во прилог граѓаните да бидат информирани, а со тоа, поголемиот број од нив не ни знаат дека консумираат вода со арсен.
Светската здравствена организација пак, го опишува арсенот како еден од најсилните отрови кој во многу мали дози убива бавно, но ефикасно.
Јованка Дојранлиева, жителка на Гевгелија, пред камерата на НОВА изјави дека иако им било ветено дека секој месец ќе се врши испитување на водата, веќе 17 месеци нема никакви информации, а седницата во општината на која се расправало за овој проблем била емитувана како снимка некаде околу 2 часот по полноќ, причина повеќе за народот да не се информира.
Активистот Никола Писарев изјави дека елитите го затајуваат овој проблем.
„Овој проблем доста успешно се евтанизира од елитите во Гевгелија веќе подолго време, се држи некаква висока рестрикција за да не се зборува за ова…на овој начин практично се обидуваме да ја алармираме македонската јавност за овој проблем на гевгеличани“, вели Писарев, и ги повика надлежните да се заангажираат за решавање на проблемот со водата за пиење.
Игор Узунов пак, кој е исто така жител на Гевгелија, вели затајувањето на овој проблем во Гевгелија можеби е со цел да не се изгубат дополнителни политички поени, и повика на инвестиции во средување на водата за пиење, која е од огромно значење за граѓаните на неговиот град.
„Пијте АРСЕНА доколку сакате проблеми со: црниот дроб, кардиоваскуларниот, респираторниот и репродуктивниот систем, како и сите видови промени на кожа“, е еден од слоганите под кои беше промовирана водата.