Дел од починатите бебиња родени меѓу 22 и 25 гестациска недела биле извадени од утробата со провокација заради одредени аномалии или заради лошата здравствена состојба и опасност по животот на мајката, а најголем дел од нив биле со инфекции кои ги имале родилките. Ова за НОВА го потврдија на Клиниката за гинекологија и акушерство.
Од таму објаснуваат дека бебињата кои се раѓаат предвреме заради инфекција кај мајката брзо добиваат сепса, тие се со неразвиени органи, неотпорни и најчесто завршуваат со смрт. Станува збор за трудници од целата држава и од приватните и од државните болници кои во таква деликатна ситуација се праќаат на Гинекологија.
Од Клиниката за гинекологија најавија дека ќе бараат од Здружението на гинеколози и од Министерството за здравство во иднина при водењето на евиденција смртноста да се заведува од 25 гестациска недела бидејќи помалите тешко преживуваат.
„ Ќе го побараме ова од надлежните фактори бидејќи на овие простори како и во соседните земји процентот на преживување кај бебиња помали од 25 гестациска е екстремно мал. Тие се со неразвиени органи, може да имаат одредени аномалии, оштетен слух, вид“, изјави за НОВА Викторија Јовановска директорка на Клиниката за гинекологија.
Таа вели дека всушност поради ова се третира дека е толку голем процентот на смртност на новороденчиња.
Јовановска сепак признава дека немаат услови бебињата кои се со инфекции да ги чуваат на 9 метри квадратни оддалеченост, како што налагаат светските стандарди, но потенцира дека немаат интерхоспитални инфекции. На Гинекологија доаѓаат најкомплицирани случаи и никој не вратиле до сега, велат од таму.
Денеска на Гинекологија била делегација од Министерството за здравство на Бугарија, за да видат и да се договорат каде може да помогнат. Таму веќе две недели има и експерти од СЗО кои дале свои препораки и ги едуцирале лекарите за промена на начинот на пристап во некои сегменти. Сега тие лекари ќе одат во родилиштата во внатрешноста и ќе им ги пренесат препораките и на другите гинеколози.
“Тоа се главно препораки околу начинот на пресекување на папочната врвка, спонатните породувања да не бидат со провокација, со притискање на стомакот на родилката и слично. Ќе се прават нови протоколи, како и анализи за да се види каде и како се прават грешки“, изјави Јовановска, за НОВА.
На Клиниката за гинекологија голем проблем е малиот број на неонатолози кои се преморени од работа и од честите дежурства, велат од таму. Гинекологија наскоро ќе остане без уште еден лекар педијатар бидејќи една лекарка веќе најавила дека ќе си оди во приватна болница.
Пред неколку дена излезе информација дека 35 новороденчиња починале во првите три месеци од оваа година, што за 2 проценти помалку од минатата година, но е сепак висок процент. Немаше детална анализа за состојбата.
Од Министерството за здравство соопштија дека бебињата починале поради предвремено раѓање проследено со екстремно неразвиени органи и исклучително ниска родилна тежина и дека се преземаат итни мерки за справување со состојбата. Од таму информираа дека во првите три месеци од годинава на Клиниката за гинекологија биле родени вкупно 1.155 бебиња. Од нив 144 биле предвреме родени и биле третирани на одделот за интензивна нега, а 35 починале. 21 бебе биле меѓу 22 и 28 гестациска недела каде процентот на преживување е исклучително мал. Вкупно шест биле со инфекции од мајката и меѓу 29 и 31 и меѓу 32 и 36 гестациска недела(едно било со тешка аномалија) каде процентот на останување во живот е мал и само едно било родено на време, но имало непоправлива мана.