Постојат сомнежи дека матични гинеколози за сума од 500 до 800 евра им ги продаваат на црно вагиналетите од кои минатата недела трудница за малку ја избегна смртта, а нејзиното бебе почина. Овој лек кој не е регистриран во државата во соседните држави се продава за 10-11 евра, тврдат на Клиниката за гинекологија.
„Доктори им ги продаваат за пари во ординациите и тоа за сума од 500 до 800 евра. Има индиции и за други случаи но, пациентките не признаваат“, изјави Викторија Јовановска директорка на Клиниката за гинекологија.
Јовановска потенцира дека гинекологот кој и ги дал вагиналетите на девојката која сакала да ја прекине бременоста во осмиот месец знаел дека бебето ќе почине, но морал да знае дека го става во опасност и нејзиниот живо. Тој и дал пет вагиналети, што е голема количина од лекот. Дежурната екипа одвај успеала да ја спаси пациентката која обилно крварела и постоела опасност случајот да заврши фатално. Станува збор за 24 годишна девојка која не сакала да роди бидејќи имала семејни проблеми.
„Докторот знаел дека бебето ќе почине бидејќи циркулацијата се пореметува, а дежурната екипа не знаеле за што се работи се додека пациентката не признала. Имаше опасност случајот да заврши со смртни последици и по трудницата бидејќи можело да прсне матката, за што ќе беше обвинет дежурниот гинеколог на Клиниката“, рече Јовановска.
Од клиниката тврдат дека пациентката го кажала во изјавата името на гинекологот кој и дал го дал лекот и очекуваат дека Државниот и санитарен инспекторат случајот ќе го пријави во полиција. На Клиниката имаат сознанија и за други вакви случаи, но пациентките обично не признавале дека земале од вагиналетите. Лекарите објаснуваат дека ваквиот лек им е потребен и бараат да се регистрира, но за други употреба, не е за поодминати бремености како што е случајот со девојката.
Инаку, првичните сознанија од инспекцијата која работи на случајот со четирите новороденчиња кои починаа во една вечер се дека човечкиот фактор не е причина за нивната смрт. Комисијата во четврток треба да се изјасни и за одговорноста на дежурниот педијатар која излегла од работа и се вратила кога првото новороденче веќе било при крај, односно пред да почине.