Северна Македонија да продолжи со реформите, а паралелно двојно да се зголемат напорите за изнаоѓање взаемно прифатлио решение со Бугарија со цел да се одблокира евроинтеграцискиот процес, порачува евроамбасадорот Деввид Гир.
Тој во неделното интервју за РСЕ на прашањето како да се дојде до решение доколку бугарските власти инсистираат на идентитетски пршања како корените и јазикот, Гир одговара дека во ЕУ, Европскиот совет работи врз основа на едногласност во одлуки како оваа. Додава дека за да се постигне согласност за преговарачката рамка, всушност треба сите 27 земји членки да се согласат. Минатата година, потсетува, тој договор не беше постигнат.
– Јас можам да разберам дека одлагањето кое го гледаат луѓето е фрустрирачко. Луѓето сакаат да се оди напред во пристапниот пат. Но, да се оди напред во ситуации како оваа, да ви одговорам на прашањето, е двојно да се зголемат напорите за да се постигне договор. Така што ние многу се надеваме дека Северна Македонија и Бугарија ќе продолжат конструктивно да се ангажираат со цел да постигнат решение врз основа на заеднички договор и на тој начин пристапните преговори ќе може да одат напред, вели евроамбасадорот во интервјуто.
За аферата со издавањето пасоши со туѓи идентитети вели не сака да коментира, бидејќи се работи за случај во истрага, но е дециден дека е прерано за коментари дека тоа го загрозува безвизниот режим на земјава.
– Јас видов разговори за безвизниот режим. Точно е дека безбедноста на документите е важен репер во набљудувањето на спроведувањето на безвизниот режим. Но, мислам дека е комплетно прерано да почне да се зборува дали ќе има или не влијание врз безвизниот режим. Ако имате наводи за безбедноста на документи важно е како државата се справува со тоа, како судскиот систем ќе управува и доколку има погрешното постапување да се справи со тоа. Ако има дупки тие да се затворени. Мислам дека тоа е случајот, а не безвизниот режим“, вели Гир.
Тој е дециден дека ЕУ никогаш не ја напуштила агендата за Западен Балкан и дека тој останува врвен приоритет, за што ја посочува посебната дискусија за европската перспектива на регионот што треба да се одржи во Луксембург.