Лицето се јавило на 194 и побарало да му биде ставена ампуларна терапија и инфузија, но кога го прашале, не кажал дека очекува резултати за КОВИД-19, дали има сомнителен или заболен член семејството или имал контакт со луѓе од странство. Тоа го кажал дури кога сестрата му ја ставала инјенкција. Неговиот син Ф.К доби кривична пријава за непочитување на самоизолација и ширење на вирусот
Медицинската сестра од Домашна посета била заразена со коронавирус од лице кое во Итната медицинска помош побарало да му биде ставена ампуларна терапија и инфузија, но кога бил прашуван по телефон, не кажал дека очекува резулати за КОВИД-19, дали имал контакт со луѓе од странство, ниту дали има сомнителен или заболен член семејството. Настанот се случил пред 15 дена, а станува збор, за лице од потесното семејство на Ф.К кој доби кривична пријава затоа што не се придржуваше на мерките за самоизолација и при тоа заразил многу луѓе, вклучително и членовите на неговото семејство.
„Лицето се јавило на 194 и побарало да му се даде ампула „Лендацин“ и физиолошки раствор. Од страна на диспечерот бил прашан дали имал контакти со лице кое има сиптоми или е заразено или пак со лица од странство, но не дал таков податок. Тогаш повикот бил пренасочен на службата за Домашна посета. Кога екипата дошла во неговиот дом тој и сопругата биле со маски и дури на сред аплицирање со инјекцијата кажал дека за два часа очекува резултат од тестот. Мединската сестра, лекарот и возачот кои биле присутни таму, останале во шок“, изјави за НОВА , Милица Бубало раководител на Итната медицинска помош.
Таа објасни дека веднаш кога се вратиле и објасниле што се случило биле ставени во изолација и им бил направен тест. Првиот тест кај медицинската сестра како и кај другите двајца бил негативен. Вториот тест кој е направен по 14 дена се покажал позитивен кај медицинската сестра и таа останува и понатаму во самоизолација. Да знаеле каде одат, да бил искрен, екипата ќе отишла комплетно опремена како за случаи со КОВИД-19, велат во Итната медицинска помош.
„Секој разговор се снима кога се јавуваат пациентите, така што се си стои документирано во системот доколку за тоа има потреба да се потврди“, рече Бубало.
Пред неколку дена , Славјанка Петровска, заминк министер во МВР изјави дека лицето Ф.К влегло во земјата на 8 март, две минути по полноќ, на граничниот премин Табановце. Требало да биде во 14 дневна самоизолација, за што потпишал и документ, но тој тоа не го сторил и при тоа имал континуирани средби со најблиските, со родителите, со пријателката, но и со вработените во фирмата при што го ширел вирусот и заразил многу лица. Кога бил откриен во полициска станица Карпош дал лажен исказ, дека не патувал надвор од земјата.
„Грешката е во свеста на луѓето, не треба да се крие ништо, треба да се кажува вистината“, вели Бубало.
Таа вели дека интервенираат и во случаи на заболени со КОВИД-19 кои се на домашно лекување и тоа го прават во координација со епидемиолози или инфектолози, организирано. Заради тоа, а и заради сериозноста со состојбата со вирусот пред службата за Итна медицинска помош е поставен шатор во кој кога се враќаат медицинските екипи се соблекува заштитната опрема, таа што е за повеќе употреби се дезинфицира, а за еднократна употреба се фрла.
Во Здравствениот дом во Скопје, покрај медицинската сестра од службата за Домашна посета, заразен е и возач од Итната медицинска помош за кој не се знае како станал позитивен на вирусот, телефонистка во Поликлиника “Чаир“, како и уште една медицинска сестра од Поликлиниката во Ченто. Сите се во домашна изолација.
„Возачот е позитивен и е во изолација од вчера, контактирани се неколку лица со кои бил во контакт и тие се во самоизолација. Телефонистката не знаеме како го добила вирусот, таа работи зад стаклен зид, а во изолација се ставени и двајца од обезбедувањето и другата телефонистка. Медицинската сестра од Поликлиниката во Ченто не знаеме како се заразила, излорана е и другата медицинска сестра што работи таму“, изјави за НОВА Виктор Исјановски директор на Здравствениот дом во Скопје.
Тој нагласи дека е извршена дезинфекција секаде, на три места пред поликлиниките и Итната медицинска помош се поставени апарати за дезинфекција.
Одлучено е вработените во Домашна посета покрај останатата заштитна опрема да носат и скафандери.