Во насока на поддршка за студентите од техничките факултети и доусовршување на нивните способности поврзани со развој на мобилните апликации, невладината организација ЕЕСТЕК ЛК Скопје и Студентскиот Парламент на ФИНКИ како ко-организатор, го организираа настанот „Code App, Level Up 2“, за кој организаторите велат, со сигурност ќе биде од огромно значење за студентите во однос на креирањето мобилни апликации и ќе претставува патоказ во натамошното студирање.
На 9-ти декември на ФИНКИ ќе се одржи официјалното отворање на интернационалната, напредна работилница „Code App, Level Up 2“ која ќе ја отвори познатиот актер Гораст Цветковски.
За време на еднонеделната работилница ќе учествуваат 12 странски и околу 40 македонски учесници кои ќе имаат можност да слушаат предавања од искусни предавачи, поделени во три модули: кодирање, дизајн и претприемништво.
Целта е да ги надоградат своите познавања и како студенти да излезат поконкурентни на пазарот.
Финалето на настанот е на 14-ти декември, каде тимовите ќе го презентираат својот краен продукт и ќе биде избран само еден тим од страна на стручното жири како победник.
Настанот ќе го затвори водителот Жарко Димитриоски.