Пратеникот од ВМРО ДПМНЕ Владимир Ѓорчев денеска официјално објави дека поднел кандидатура за претседателски кандидат од неговата партија.
Партиската кандидатура треба да биде потврдена на конвенцијата која ќе се одржи на 16 февруари во Струга.
-Има моменти во животот кога човек треба да го искористи своето знаење, искуството и познанствата и она што тој го направил за државата и за народот.Македонија губи, Македонија назадува. Не се добри состојбите во Македонија. Од тие причини се кандидирам за претседател на РМ. Поседувам искуство, мотивација, чесност, лојалност, рече Ѓорчев на прес конференцијата во Собранието.
Тој најави дека во следните три месеци ќе патува во секое место, каде ќе ја побара повторно поддршката од оние кои и досега му го давале мандатот, додека на, како што ги нарече скептичните, ќе им даде објаснување за сите нивни дилеми.
Оваа апсолутистичка власт што „Економист“ ја дефинираше како хибриден режим мора да има баланс. Не смее да се дозволи на СДСМ и Зоран Заев да ги узурпира институциите на државата. Пораз не прифаќам, на сите 5 изборни цикулуси на кој сум бил носител секогаш сум победувал. Ги имам сите рекорди во победа, рече Ѓорчев.
За тоа кој ќе му биде противкандидат рече дека „ не се грижи“ и додаде дека „СДСМ треба да му ја мисли“.
-Во 21 часот вечерта на 21 април половина час ќе набројуваме каде сме победиле, рече Ѓорчев.
Освен Ѓорчев на партискиот оглас кој е отворен до 31 јануари досега има пријавено уште еден кандидат за претседател кој е непознат за јавноста.
ВМРО-ДПМНЕ на 4 јануари објави јавен повик за пријавување кандидатури за избор на претседател на државата за претседателските избори напролет. Рокот за пријавување кандидатури за претседателски кандидат на ВМРО-ДПМНЕ истекува на 31 јануари.
Претседателскиот кандидат ќе го бираат 550 делегати на Конвенцијата на ВМРО-ДПМНЕ со тајно гласање на 16 февруари. За избран ќе се смета кандидатот кој добил најмногу гласови од сите кандидати, но не помалку од 1/3 од вкупниот број на делегати.
-Повеќе од 20 години Ѓорчев е дел од ВМРО-ДПМНЕ. Повеќе од 20 години Ѓорчев ги премолчува сите криминални и погубни политики на неговата партија. Со години молчеше за криминалите на Груевски, денес молчи за антидржавното и антизападното однесување на неговиот шеф, Мицкоски, се вели во реакцијата од владејачката СДСМ.