Договорот со здружението на приватни превозници „Слобода Превоз“ денес е раскинат поради неисполнување на обврските кои произлегуваат од договорот, соопштија попладнево од Град Скопје.
„Во случајов, се работи за обврската за континуирано и непрекинато давање на јавната услуга за превоз на патници. За жал ‘Слобода Превоз’ повеќе од два дена во континуитет не ја извршуваше оваа договорна обврска со што поради непочитување на договорот истиот е раскинат“, се наведува во соопштението објавено по тој повод.
Градот, истовремено, ги повика заинтересираните приватни превозници да се јават на јавниот повик кој ќе биде објавен во текот на следната недела.
„Сметаме дека со овој модел, склучување на директни договори за јавен градски превоз со индивидуални превозници ќе придонесе за поголема транспарентност на процесот и полесно разрешување на потенцијални проблеми“, велат од градското раководство.
Во соопштението се нагласува и дека градскиот јавен превоз функционира непрекинато, а Јавното сообраќајно претпријатие Скопје во овој момент има доволно капацитети да ги задоволи потребите на скопјани.
Истовремено упатија и повик до „Слобода Превоз“ во врска со утрешното бликирање на улиците. „Апелираме до ‘Слобода Превоз’ да ја ревидираат одлуката за блокирање на главниот град, бидејќи на тој начин нема да постигнат разрешување на проблемот, напротив, на овој начин проблемот се продлабочува. Скопјани не се должни да бидат колатерална штета, поради нерационалните барања на ‘Слобода Превоз’. Со уцени, нема договор“, се вели во апелот.