Со 24 гласа „за“ и 10 „против“, советниците на Град Скопје на денешната седница дадоа согласност и право на градење на Шпанските скали на Плоштад Македонија.
Шпанските скали се партерен дел, надворешни скали од објектот за комерцијални и деловни намени во неокласичен стил.
Општина Центар издаде дозвола за изградба на објектот, а советниците на Град Скопје денеска дадоа зелено светло и за скалите, бидејќи површината на која тие треба да се градат е под надлежност на Градот.
Според идејното решение на Министерството за транспорт, зградата, во чиј склоп ќе бидат и скалите ќе биде висока 16 метри, односно приземје плус 3 ката.
Освен скалите, од двете страни на главниот влез ќе има две кочии со коњи, а низ целиот објект од надворешната страна ќе има околу 25 скулптури.
Скалите ќе ги гради компанијата „Амадеус груп“. На електронската аукција фирмата понуди 93.100 денари за метар квадратен или вкупно 1.580.000 евра за парцелата од 1046 квадрати на која е планиран објект за комерцијални и деловни намени во стил на барок.
За изградба на барокната зграда инв еститорот беше ослободен од комуналии.
Според потпретседателот на СДСМ – Дамјан Манчевски, се работи за државен рекет.Тој тврди дека инвеститорот бил ослободен од комуналиите, но од него е побарано да го компензира ослободувањето со градба на т.н. Шпански скали на негова сметка.
-На седницата на советот на Скопје, во февруари 2015 година, владејачкото мнозинство донесе одлука за ослободување на инвеститорот „Амадеус Груп“ од плаќање на комуналии за барокна зграда на плоштад Македонија во вредност од 150 000 евра. Уште тогаш предупредувавме дека се работи за државен рекет, односно дека многу брзо од инвеститорот ќе биде побарано да го компензира ослободувањето со градба на т.н. Шпански скали на негова сметка.
Денес сме сведоци токму на тоа. На инвеститорот, надовно одеднаш му текнало и решил од сопствени средства да ги изради Шпанските скали. Да немаме никакви дилеми, ова му текнало на криминалецот Никола Груевски. Личи на него и провидно е како него Ова е само продолжение на газењето на волјата на граѓаните, особено на граѓаните на Центар, кои му кажуваат силно НЕ на Скопје 2012, изјави Манчевски денеска пред почетокот на седницата на Град Скопје.