Синоќешниот краткотраен силен дожд и град од околу половина час предизвикаа поплави и оштетени фасади во главниот град, што иницира прашања за соодветна и современа инфраструктура.

Неделче Крстевски, портпаролот на Град Скопје, причина за поплавите било паѓањето на градот, кој ги запушил решетките од атмосферската канализација.

-Скоро во сите општини постојат делови каде што нема атмосферска канализација. Не велиме дека е сјајно, допрва треба да се гради, но тоа е надлежност на самите општини, а не на Град Скопје. Но, причина за поплавите е градот, затоа што тој ги запуши решетките од поставените канализации, изјави Крстевски за НОВА.

За разлика од Крстевски, поранешната претседателка на Архитектите, Драгица Павловска- Циги, за НОВА вели дека очигледно не е соодветно поставена атмосферската канализација, затоа што по ваков налет би требало да не се случуваат вакви поплави.

– Атмосферската канализација е слабост на градот, невралгична точка и досега требаше да биде санирана. Проектот 2014 покажува дека се пробиени параметрите и поплавувањето на некои згради е опомена, вели Павловска.

За денеска повторно се најавува невреме, заради што Центарот за управување со кризи упати апел до граѓаните, без особена поголема причина, да не се изложуваат на опасности со престој на отворен простор, поради можни атмосферски електрични празнења. Исто така, без посебна причина да не управуваат со моторните возила особено ако е забележливо можно невреме и пороен дожд, заради нивната сопствена безбедност.