Почнувајќи од 7 мај годинава, Град Скопје воведува приемни денови во кои дежурни правници ќе одговараат на прашањата на граѓаните од областа на даночната политика. Секој вторник и петок, во текот на работната недела во периодот од девет до 16 часот граѓаните ќе може да добијат одговори на сите прашања во врска со решавањето на пријавите и барањата по предмети по основ на данок на имот. Од Градот велат дека овој новитет се воведува со цел побрзо и поефикасно работење на даночната администрација.
„Во насока на подобрување на даночните услуги за граѓаните, Град Скопје од 1 јануари воведе двосменско работење во бараката број 16, со работно време од 7.30 до 19.30 часот за прием и издавање документи поврзани со даноците на имот. Исто така, со цел поедноставување на процедурите во врска со даноците на имот, во Град Скопје веќе подолг временски период дежурен правник и проценител во бараката број 16, соба 2, во периодот од 8.30 до 16.30 часот секој работен ден, извршуваат процени на имот и им даваат правни совети на граѓаните во врска со нивните поднесоци во даночното одделение“, се наведува во соопштението на Град Скопје.
Од таму посочуваат дека и во наредниот период ќе продолжат континуирано да работат на имплементирање на оптимални решенија во насока на целокупно подобрување на даночните услуги за граѓаните.
Град Скопје воведува два приемни дена за даночни прашања
0Published: Wednesday, May 2, 2018 12:44



