Сакам да ве прашам: мислите ли вие дека ова е пелтечење на една стара будала или е опција во која сите можеме да завршиме како градинарот на претседателката. Кочани покажа дека се е можно. И многу други случаи. Знаете ли дека се плашам дека при некоја операција власта и нејзините симпатизери можат да организираат никогаш да не се разбуди најголемиот македономрзец и предавник?
Бранко Тричковски
Може ли претседателката да го убие својот градинар?!
Човекот што цвеќето го расте.
Или готвачот?
Или дизајнерката која прави подвизи правејки креации во кои нашата претседателка изгледа ко Кејт Мидлтон на Вимблдон?
Или некоја будала од богатата кабинетска понуда?
Што ќе се случи ако нешто од сево ова се случи?
Претпоставка е дека не е толку крвожедна да ги ликвидира сите жители и служители на Шато Водно.
Прво ќе излезе Панчо Вила и ќе рече дека истрагата ќе покаже што се случило, но дека првите сознанија велат дека градинарот се самоубил така што стапнал на гребулата од страната на металните запци и дршката го убила со силен удар по челото.
Дафкова, облечена во фустан од црн сатен, во камерите на “само вистина” или некое друго теве срање, ќе изјави дека е потресена и ќе покаже марула што заеднички ја растеле со починатиот.
На сите телевизии ќе оди прилиг дека дизајнерката се самоубила по критиките што јавноста ги упати на тоалетите на Дафкова или затоа што не можела да ја поднесе изневерата на своето момче.
Итн.
Во меѓувреме истрагата ќе тече бавно како Парана од Дневникот на Гомбрович.
И темелно, нормално.
Обдукцијата ќе покаже дека кој и да е од наведените мртов, умрел така што кренал раце врз себе.
Втората опција е (градинарот) несреќен случај.
На една телевизија ќе се појави вест дека Филипче стои зад смртта на будалата од кабинетот на Дафкова, односно дека не се работи за самоубиство, туку за убиство.
Од Судска медицина ќе речат дека ќе ја повторат обдукцијата да видат дали во телото на умрениот ќе најдат куршум, заглавен некаде во дебелото црево.
И ќе излезат со соопштение дека е најден калибар од девет милиметри во дивертикулите на колонот.
Од обезбедувањето на претседателката ќе кажат дека вечерта чуле некој сомнителен шум, можеби и пригушен истрел, но дека помислиле оти тоа шумските животни имаат секс.
Некој рекол дека треба да се провери претседателката, демек, кај била во времето на смртта, што правела, но утредента тој љубопитен човек е пронајден мртов, навидно предозиран со хероин.
И не само мртов, туку и компромитиран како наркоман чии изјави не смеат да се земаат сериозно.
Сакам да ве прашам: мислите ли вие дека ова е пелтечење на една стара будала или е опција во која сите можеме да завршиме како градинарот на претседателката.
Кочани покажа дека се е можно.
И многу други случаи.
Знаете ли дека се плашам дека при некоја операција власта и нејзините симпатизери можат да организираат никогаш да не се разбуди најголемиот македономрзец и предавник?
По што ќе следи комисија, меѓународна експертиза, истрага, изјави, може дури и некоја жртва да падне, доктор анестезиолог или хирург што шмркал кокаин, сеедно, но Тричко ќе продолжи да си спие во Хотел “Македонија”, сосема бесплатно.
Дафкова е тука како брутална хипербола.
Сите знаеме дека не би згаснала ни мравка.
Се надевам дека правилно ќе ме разбере.
Дека се создадени услови за физички ликвидации.
И за нивно забошотување.
Мартин Дали и Марго Вилсон ја застапуваат тезата дека “убиството на противникот е краен облик на стратегијата за решавање на судирите”.
Таа доктрина, така спектакуларно, без многу крв, но ефектно и ефикасно, ја применува другарот Путин.
Македонскиот Владимир во една вечер уби толку луѓе колку што Путин нема џамови.
Размислете за овие констелации.
Пред да ве лизнат од некој џам.
И да почне истрагата за која нема информации помеже власта не сака да ја компромитира со вистината.
Кога вистината е убиена, смртта е реална опција!
Од Фејсбук ѕидот на авторот