Викендов, нашата земја беше зафатена од нестабилни временски услови кои предизвикаа пороен дожд и град на повеќе места низ државата. Екипи на Министерството за земјоделство, шумарство и водостопанство денеска се на терен низ повеќе региони и вршат увид на состојбата и штетите предизвикани од невремето. Министерот Николовски заедно со директорот на Управата за хидрометеоролошки работи (УХМР) Ивица Тодоровски, го посетија Лозово кое вчера во текот на ноќните часови беше зафатено од силно невреме проследено со град.
„Денеска сме во Лозово заедно со земјоделците и директорот на УХМР, Ивица Тодоровски каде вршиме увид врз штетите кои ги предизвика невремето. За жал најголеми штети се забележани во Лозово, кое со град и силен дожд е зафатено во текот на ноќта после 22:30 часот. Сепак да не беа овие дејствувања од страна на авионите низ целата држава, ваквите штети како Лозово ќе беа на многу повеќе места“, изјави министерот Николовски.
Лозово настрадало, појасни министерот, затоа што невремето се случило во доцните ноќни часови, а тоа е период во кој авионското дејство е невозможно од безбедносен аспект за пилотите.
Николовски ги повика општинските комисии да излезат на терен и да започнат со процена на штетите и подготовка на план за обесштетување на земјоделците.
Радарските центри Тополчани и Ѓуриште редовно ги следат градоносните облаци и врз основа на параметрите од радарската контрола, вчера и завчера беа активирани воздухопловите за авионско разбивање на градоносните облаци. Дејствувано е со вкупно 396 „истрели“ од кои 257 во Пелагонискиот регион каде е дејствувано врз повеќе градоносни облаци а дејствувано е и во Преспанскиот, Охридско-Струшкиот, Полошкиот и Велешкиот регион. Со навремената реакција на УХМР спречена е појава на град на повеќе од 80 отсто од регионите зафатени со градоносни облаци, а со тоа се заштитени земјоделските посеви, велат од Министерството.
Разбивањето на градоносни облаци со сребрен јодид е успешна метода со која градот се претвора во дожд. Дејствувањето на авионите нема цел да спречи појава на дожд, кој е корисен за земјоделските површини, туку единствено има за цел да дејствува во разбивање на градоносни облаци, и спречување на град и штети на земјоделските површини, дополнуваат од Министерството за земјоделие.
Министерството подготвува нов закон за осигурување во земјоделството, преку системот Земјоделски осигурителен пул. Овој систем има за цел да ги заштити земјоделците од неповолните климатски промени од една страна и од друга страна да го забрза процесот на обештетување во случаи кога сепак ќе настане штета предизвикана од временски непогоди. (С.К.)