Двајца македонски градоначалници се притворени во Бугарија. Тие се задржани на граничниот премин Станке-Лисичково поради пронајдени куршуми во автомобилите, јавуваат бугарските медиуми.
Неофицијално, како што јавува бугарски Стандард, задржани во 24 часовен притвор се градоначалниците на Виница и на Кочани, Е.Д.(39) и Р.Д. (57).
Првите луѓе на овие две општини вчера вечерта се враќале кон Македонија од Благоевград каде што делегација од земјава учествувала на форумот „Бизнис без граници“ . На форумот покрај локалните функционери учествувале и бизнисмени од двете земји.
– Во автомобилите им се откриени куршуми за малокалибарка и пет кутии ловечки куршуми. Наши колеги ги задржале и двајцата дале објаснувања – велат граничните полицајци за бугарските медиуми.
Муницијата била пронајдена во автомобил „Ситроен“ со кој се враќале кон дома, а според непотвредени информации, како што јавуваат медиумите, бугарски граѓанин се обидувал да ги оправда градоначалниците тврдејќи дека куршумите се неговите но ги заборавил во автомобилот.
Во моментов немало обвинети лица за случајот, а градоначалниците се задржани во 24 часовен притвор според законот на бугарското Министерството за внатрешни работи.