Се смирува тензијата во Тимјаник. Ова за НОВА го изјави градоначалникот на Неготино, Тони Делков кој бил таму и разговарал со жителите на Тимјаник. Тој смета дека жителите на Тимјаник биле погрешно информирани за децата кои треба да бидат донесени од Заводот во Демир Капија.
Делков рече дека не знае кој го направил плакатот со кој жителите се повикуваат на бојкот, но веќе имаат некакви сознанија кој има давал погрешни информации на жителите на Тимјаник.
„Не знам кој стои зад плакатот кој ги повикува на бојкот за центарот, но очигледно е дека биле погрешно информирани од некои луѓе. Им било кажано дека ќе има 10 деца во тој мал простор, дека се агресивни. Верувам дека во скоро време ќе се оградат од сите работи кои беа кажани, дури и некои ќе се согласат да волонтираат“, изјави за НОВА, градоначалникот Делков.
Сепак, тој смета дека локацијата каде што е планиран центарот не е соодветна бидејќи е на самиот регионален пат, објектот не е ограден и дека е опасно за децата доколку излегуваат сами надвор.
Делков ја потврди информацијата на НОВА дека пред извесно време му пратил писмо до премиерот Заев во кое го известува дека локацијата не одговара за станбена единица за деца со попреченост и дека жителите не се согласуваат со одлуката на Министерството за труд и социјала.
Неофицијално, атмосферата во Тимјаник ја подгреале вработени во Заводот во Демир Капија кои се уплашени за своите работни места. На социјалните мрежи пак, има коментари дека во Демир Капија ќе се гради камп за бегалци и дека заради тоа се празни Заводот, а не заради деинституционализација.
Министерката Мила Царовска е на службено патување во странство после кое им вети на жителите на Тимјаник дека ќе се врати повторно да разговараат, кога ќе слегнат тензиите.
Проектот за деинституционализација предвидува да се извадат сите корисници на Заводот во Демир Капија за да живеат во мали домови во населени места со тимови кои ќе се грижат за нив 24 часа. Вакви мали домови се предвидени во повеќе градови во државата.
Овој процес што започнува годинава треба да заврши за две до три години. Центарот во Неготино и тој во Тимјаник се дел од проектот за деинституционализација на штитениците од Заводот во Демир Капија каде има вкупно 216 лица. Со проектот е предвидено за две до три години сите тие да бидат ресоцијализирани и вклучени во општеството, а не во големи, безлични и сегрегирачки институции. Тој е поддржан од УНИЦЕФ, УНДП и од Европската Унија.