Градската власт подготвува скандалозна замена на деловни простори меѓу Јавното претпријатие Комунална хигиена и фирмата која е сопственик на имотот на поранешната фабрика за автобуси “ФАС 11 октомври“ – Унитајарс Стил Импекс, дознава НОВАТВ.
На утрешната седница на Советот на Град Скопје ќе треба само да се верификува одлуката на Управниот одбор на Комунална хигиена, со која ќе се изврши размена на деловни простории на јавното претпријатие од 1366 метри квадратни во центарот на Скопје со распаднати и руинирани згради сопственост на поранешната фабрика за автобуси „ФАС 11 октомври“.
Идејата за ваков чекор потекнува од минатата година, кога Управниот одбор на јавното претпријатие донел одлука да се изврши проценка на вредноста на деловните простории во центарот на Скопје.
Под изговор дека канцелариите се расфрлани на повеќе локации, Управниот одбор решил да ги трампа:
„Јавното претпријатие Комунална хигиена Скопје своите деловни активности ги извршува на повеќе локации во повеќе деловни простории кои се поврзани со издавање/одлевање на повеќе финансиски средства, неможност да се обезбеди највисока можна економичност, ефикасност и ефективност во работењето. “, се вели во одлуката на Управниот одбор од 10 јуни 2015 година.
Комунална хигиена за проценка на имотот го ангажирала Бирото за судски вештачења, кое просториите во центарот на Скопје ги проценило на 1.561.950 евра. Донесена е одлука, имотот да се менува со просториите на ФАС 11 октомври во сопственост на Унитајарс Стил Импекс.
Ова се локациите и просториите кои ќе ги даде Комунална хигиена на фирмата чиј сопственик е бизнисменот Славе Распашковски.
Улица Македонија бр. 45 Скопје Дирекција над Краш 222 квадрати
Ул, Иво Рибар Лола бр.58/2 Скопје Палата КУЗМАН 367 квадрати
Ул. Илинденска б.б. Скопје спроти Влада на РМ 535 квадрати
Ул. Иво Лола Рибар 59/2 Скопје Палата УНИЈА 212 квадрати
Проценетата вредност на имотот на Комунална Хигиена во центарот на Скопје е 1.561.950 евра, а на просториите на ФАС 11 октомври во општина Гази Баба се проценети на 4.939.104 евра. Распашковски не само што ќе добие „златен имот“, туку и разликата од проценетата вредност од 3.300.000 евра.
Од Комунална хигиена денеска не сакаа да ја коментираат својата одлука. Тоа ќе го стореле кога одлуката ќе поминела на Советот на Град Скопје и ќе станела правосилна.
Извори за НОВАТВ, велат дека се сомневаат во веродостојноста на проценката на имотот, оти не е возможно деловен простор во срцето на Скопје, да има иста вредност како деловен објект во општина Гази Баба. Според изворите на НОВА, токму тука е направена целата „ујдурма“, како да се добие привид дека трампата има економска оправданост.
Кој е интересот за запуштената „Фас 11 октомври“
Во 2003 бизнисменот Славе Распашковски ја купува фабриката „ФАС 11 Октромври“. Фабриката е задолжена и во лоша состојба, а Расшпаковски прави неколку неуспешни обиди да ја рестартира и да го зголеми производството на автобусите.
Зделките на владата со Кина, кога ЈСП одлучи оттаму да го купува новиот возен парк, речиси ја закопаа судбината на оваа фабрика. Работниците останаа без работа, а на Распашковски му останува и кредит од 5,5 милиони евра кон Стопанска банка – Битола по што почнува да се распродава имотот на „ФАС 11 Октромври“ откако се активира хипотеката. Првите лицитации беа неуспешни.
Според деталниот урбанистички план „Ќерамидница 1“на местото на оваа фабрика предвидено е изградба на големи трговски единици, а се планира и пат кој преку „Ќерамидница“ ќе води до Аеродром или точно до хотелот „Русија“ на бизнисменот Сергеј Самсоненко.
Освен деловни единици, за овој простор кај Ќерамидница е предвидена и израдба на станбени објекти. Општината од ова место кога го менуваше дуп-от најавуваше развој и нова скопска елитна наслеба. Со оглед на фактот што градот Скопје овде ќе гради пат кој ќе ги поврзе Аеродром и Центар, како и тоа дека населбата, иако сега запоставена, е на добра локација и речиси до центарот на Скопје, бизнис интересите на многумина да се дограбат до просториите на ФАС не се зачудувачки.