Неколкумина ентузијасти, два веб портали и единствена желба- да им се врати гласот на граѓаните, да се чујат нивните размислувања, потреби и проблеми во време кога овој глас останува на маргините.
Нова ТВ и Радио Моф, започнуваат заеднички проект за развој на граѓанското општество. Целта е не само декларативно, туку реално да се обидеме да ги допреме вистинските проблеми на луѓето околу нас, да ги раскажеме нивните животни приказни и да се обидеме да најдеме решение за подобро утре.
Да, тоа ќе значи истовремено и разбивање на илузијата за совршеното демократско општество која можеби сакаат да ни ја продадат политичарите, но доаѓа време кога и тие ќе треба да се спуштат на „земја “ и да разберат дека постојат за да ги бранат интересите на своите гласачи, а не спротивното.
Транзицијата и тапкањето во место ги умори македонските граѓани, станаа апатични и уверени дека немаат никаакво влијание врз општествените случувања. Постои страв од јавно говорење, но и силен револт од нештата кои не туркаат кон бездна. Општеството е поделено, но проблемите се исти, граѓански, човечки.
Свесни сме дека овој проект нема да предизвика револуционерни промени, но остануваме уверени дека наша должност е да работиме на промена на перцепцијата кај обичните луѓе, да ги охрабриме граѓанските здруженија и да бидеме гласот на оние кои немаат друг избор, освен да молчат.
Овде ќе може да се слушнат студентите, екологистите, ЛГБТ заедницата, сексуалните работници, борците за човекови права, хуманитарните работници но и размислувањата на нашите соседи, пријатели или познаници кои сакаат поубава населба, почист воздух, подобри болници или училишта..
Затоа и ги повикуваме невладините организации, формални и неформални граѓански здруженија, но и сите граѓани кои имаат идеи, проекти, активности и желба за подобро живеење, заедно да соработуваме и да се бориме против неправдите и дискриминацијата.
Сите текстови, аудио и видео прилози ќе може да се најдат во делот „Граѓани“ на Нова ТВ и на сајтот на Радио МОФ.
Се надеваме на долга и успешна соработка, но и на промени кои допрва ќе се случуваат во нашето општество.
Почмуваме од луѓето на маргините на кои најмалку им се слуша гласот во јавноста. Во првиот прилог во нашата нова рубрика ГРАЃАНИ го пренесуваме гласот на “Проститутката” Мила.
Јасмина Јакимова