Постер на Бојана Хаџиванова, учесничка во проектот
Граѓанину, исправи се, проговори!
Овде човекот пропаѓа. Му гори душата, му се рушат соништата.
Да е светот мал би те згазил секој, светот е голем и пак, те сопнува некој. Се движиш, бараш, прашуваш, а понекогаш и се лулаш во чамецот на забуната. Не секој човек знае се, иако, многумина мислат дека знаат се. Самокритиката е бисер на проодувањето, потоа секој самостоен, независен чекор е ланец од самодоверба. Заштити ја секоја своја, до последна, стапка и продолжи да растеш натрупан со идеи и ставови, едноставно – брани ги своите права.
Длабоко во себеси носи ги своите права. Грижи се и бори се за нив! Но колку ќе ти биде дозволено од сите оние што те опкружуваат, оние што те поддржуваат, оние умните кои „секогаш знаат се”, оние што не се согласуваат? Никој ништо не ти гарантира! Но ти бори се! Не заборавај дека секој има право на глас, дека секој има право на слободен чекор. Понекогаш, на пример, расизмот расте во телото на душманите.
Но, една темна насмевка знае да го развесели денот, а некои бели образи, сепак, да се зацрвенат од срам. Бојата на кожата е само симбол колку нè има, колку се разликуваме едни од други, но и колку сме исти длабоко под кожата. Светот е разнобоен и многу различни врати има. Многумина го забележуваат тоа, но има и такви кои поретко го ценат. Погрижи се ниедна критика фрлена кон тебе да не може да го откова твојот став, а твојот стил да не може да го измени ничиј поглед. Ако се затвориш во себе ќе се уништиш!
Најпрво тргни од она дека секој има право на избор и на сопствена среќа. Понекогаш правата на човекот се кршат, иако, се заштитени со закон. Денес, законот е само мамец за држење на вистинскиот правец. Не се умира кога ќе ти ја пролеат крвта, се умира кога ќе ти ја одземат надежта. Кој ја сака розата, се навикнува на нејзиниот трн. Затоа треба постојано да се бориме за сопствените, но и за правата на другиот и поразличниот од нас. Треба да станеме вечни победници на самите себе!
Маската на човека лесно се воочува, но тешко се разоткрива. Човекот твори за да живее, тој живее токму за да твори. Сите сме дел од шареното општество, сите различно се обојуваме, сите сакаме подобро да живееме. Но, некој се бори за главна тема на озборување, а некој за корка леб и трошка слобода.
Овде човекот пропаѓа. Му гори душата, му се рушат соништата. Но зошто да е така? Дај човеку, граѓанину, застани и исправи се! Проговори! Не се предавај, бори се за она во што веруваш, покажи дека ти си светлината во мракот, дека токму ти ќе ја направиш промената!
Памела Арсова
Авторкатa е студентка
Програмата „Млади промотори на слобода на изразување“ ги поттикнува младите луѓе преку есеи, мултимедијални продукти и кампањи што сами ги осмислуваат да бидат активни граѓани кои се борат за слободата на изразување, а против говорот на омраза, стереотипизирањето и етикетирањето. Авторите на есеите, мултуимедијалните продукти и на кампањите се средношколци и студенти кои штотуку стапнуваат на јавната општествена сцена и бараат слободен простор за себе и за своите ставови. Повеќе информации за активностите во проектот може да добиете на http://www.mof.mk/izrazise/
Проектот „Млади промотори на слободата на изразување“, финансиран од Европската Унија, преку Европскиот инструмент за демократија и човекови права (ЕИДХР), го реализираат НВО Инфоцентарот и Младинскиот образовен форум. Содржината на текстовите е единствена одговорност на НВО Инфоцентарот и Младинскиот образовен форум и на никаков начин не ги рефлектира гледиштата на Европската Унија.