Се поголем е интересот на граѓаните во Струмица за креирање на општинскиот буџет. Бројни предлози за проекти од месната самоуправа, културни манифестации, социјална програма, образование, локален економски развој и поддршка на НВО секторот, заштита на животната средина, спорт и рекреација, беа дадени синоќа до градоначалникот, Зоран Заев, на Форумот на заедницата.
Oтворање на спортска вежбалница, спортски музеј, велосипедска патека околу Струмица, олимписки базен, кошаркарско игралиште, парк игралиште за домашни миленичиња, младински културен центар, дигитализација на ретки книги од XIX и почеток на XX век и издавање на 10 наслови од роднокрајни автори, скејт парк, реконструкција на детски игралишта, доградба и адаптација на училници, беа само дел од предлозите според кои граѓаните сметат дека се потребни на Струмица.
Струмичкиот градоначалник даде одговор на сите предлози односно дали истите се во надлежност на општината, а за оние кои не се во надлежност, ги упатуваше граѓаните на соодветната институција и им ја објаснуваше постапката за решавање на проблемот.
Сепак, локација за реализација на голем дел од предлозите е поранешната касарна, простор во кој можат да бидат сместени многу објекти. Поранешната касарна во Струмица инаку е дел амбициозниот владин проект „Старите касарни за нов развој – Владата за граѓаните“, промовиран во времето кога министер за одбрана беше Зоран Коњановски, но и по пет години не важи само за општина Струмица. Сите други девет општини, од вкупно десет, ги добија објектите од касарните со цел за побрз локален економски развој, пишуваше НОВА.
Од општина Струмица велат се додека градоначалник на Струмица е Зоран Заев, министерството и Владата ќе пробувават на било каков начин да ја одлагаат постапката и да не ги додели дел од објектите од касарната на општината да стопанисува со нив.