Македонските граѓани најмногу пијат лекови за висок крвен притисок, циркулација и за смирување. Еналаприл, Пентоксифилин и Дијазепам се трите лекови кои најмногу се трошеле во изминатата година покажува извештајот на Фондот за здравствено осигурување. За лекот Еналаприл биле потрошени дури 1,65 милиони рецепти што е за 7,8 проценти повеќе од претходната 2011 година.
-Ова значи дека кардиоваскуларните заболувања и понатаму се на прво место, а лековите за смирување терапија без која не се може коментираат лекари кои ги контактираше НОВА.
Фондот пак, најмногу пари минатата година потрошил за лекот Аторвастатин кој се користи за сузбивање на холестеролот во крвта. За овој лек се потрошени 6 проценти од вкупната сума за сите лекови кои се на товар на фондот, или 19 проценти повеќе од тоа што било потрошено за истиот лек минатата година.
И овој лек како и претходните два спаѓа во групата кардиолошки лекови. Дали станува збор за форсирање на одредени лекови од страна на лекарите од фондот не информираат, но како што се вели во извештајот во иднина ќе ги обучуваат докторите за рационално препишување на лекови и редовно ке ги информираат кои лекови се без доплата, за пациентите да не бидат изложени на дополнителни трошоци.
Инаку, за првпат оваа година пациентите најмногу се лекувале во општите болници, а на
второ место се Универзитетските клиники како највисоко ниво на здравствена заштита. И покрај тоа најголем број на болнички денови на пациенти е регистриран токму на скопските клиники, што значи дека пациентите од другите болници на крај пак завршуваат во клиничкиот блок.