Наместо блокадите што се одржуваат на „Партизанска“ пред Симпо, кај мостот „Гоце Делчев“ и кај Стара Рампа, утре со почеток во 12 часот, пратеничката Весна Бендевска, најави граѓански парламент, пред Собранието на Република Македонија.
Овој настан, Сојузот за иднина, го организираат бидејќи за утре е најавена седница на Собранието на Република Македонија, на која ќе бидат поставувани пратенички прашања, без присуство на опозицијата.
“Иако ние пратениците, кои бевме тепани и насилно исфрлени од парламентот на ”црниот понедделник”, немаме намера да се вратиме во овој состав на Собранието, нема да се откажеме од нашите прашања, напротив прашањата ќе бидат поставени на уличниот, демократски парламент”- изјави Весна Бендевска, заменик координатор на пратеничката група на СДСМ.
Во продолжение, Бендевска додава дека опозицијата ги повикува сите граѓани, да им се приклучат на овој граѓански парламент, за заеднички да изразат отпор против диктатурата, а на Власта да и порачаат дека народот бара да биде прашан на предвремени парламентарни избори, за да може на денот на гласањето да му го испорача одговорот на неговите тоталитарни методи на владеење.