Според грчкиот весник „Елефтеротипија“, „една седмица по писмото на македонскиот премиер Никола Груевски до неговиот грчки колега Андонис Самарас, францускиот претседател се понуди да помогне во решавање на прашањето“.
„Истакнувајќи ги добрите односи кои Париз ги има и со Атина и со Скопје, Оланд нагласи дека Франција сака да помогне во изнаоѓање решение, со цел, меѓу другото, да се отстрани главната пречка на патот на соседната земја кон Европската унија“, пишува весникот „Имерсија“ под наслов „Иницијатива на Оланд за прашањето за името“.
Грчките медиуми потетиваат дека оваа изјава Оланд ја даде на маргините на самитот на земјите од Југоисточна Европа на која учествуваат лидери од Србија, Хрватска, БиХ, Албанија, Црна Гора, Косово и Македонија.
„Важно е да се спомене дека Оланд е првиот влијателен европски лидер кој е поканет да учествува на самитот, кој го покренаа Словенците и Хрватите кои до скоро имаа големи несогласувања но беа решени со компромис по што Хрватска од 1 јули стана членка на Европската унија“, коментираат грчките медиуми.
Под наслов „Оланд се понуди да помогне во решавањето на прашањето за името“, весникот „Етнос“ пипува дека Оланд на заедничка прес-конференција со словенечкиот претседатл Борут Пахор ја „повтори заложбата на Франција за ширење на Европската перспектива“.
„Прашањето за името во моментов го попречува целиот процес и факт е дека не можеме да останеме на тоа… Ние можеме да зборуваме со секого, имаме одлични односи со сите балкански земји“, ја пренесува „Етнос“ изјавата на шефот на француската држава.