Во одговорот од грчката страна на иницијативата покрената во писмото на еврокомесарот Филе, се вели дека „Грција не е против евентуалната средба на еврокомесарот Филе со шефовите на дипломатиите на Грција и Македонија, Аврамопулос и Попоски, но потсетува дека суштинските разговори се водат во Обединетите нации.
Од грчкото МНР бараат и таквата евентуална средба да има конкретни резултати.
„Во врска со можноста за средба на министрите за надворешни работи на двете земји со комесарот Филе, како што споменува Филе во неговото писмо, за да се промовира грчката иницијатива за потпишување меморандум за разбирање меѓу Грција и ПЈРМ, Грција првично не е против средби, под услов да има добра подготовка и најважното – да се гарантира дека ќе имаат суштински резултат.
– За потсетување, суштината на преговорите со Нимиц, кој е одново активиран благодарение на грчката иницијатива, не е поврзан во никој случај со Европската унија“, се вели во писмената изјава на портпаролот на грчкото МНР, Григорис Делавекурас.
Еврокомесарот Штефан Филе вчера испрати писмо до двајцата министри во кое предложи нова рамка со која Европската комисија би имала директен увид во процесот на преговори за името. Во писмото, Филе вели дека целта е да се надградат заклучоците за Македонија.
Ваквиот предлог позитивно беше прифатен од македонскиот државен врв и експертите.