Надлежните неспремни го дочекаа грипот годинава. Ги изненади. Како и со снегот, вообичаено. Само што со снегот не видоа некој бизнис , но со грипот очигледно, да. Но, за тоа подоцна. Еве што се случува.
Сезона на грип е, а во најголемиот пик на вирусот државата не набавила од единствениот антивирусен лек Тамифлу. За овој лек досега не убедуваа дека е спасоносен ако се прими во првите 48 часа од заболувањето, дека ги намалува симптомите на грипот, како и деновите поминати на боледување.
На Инфективната клиника нема игла каде да се фрли од пациенти. Дежурните тимови деновиве имаат полни раце работа. Клиниката за детски болести е исто така полна. Но, лекот Тамифлу го нема. Лекарите на инфективна клиника го препишуваат на амбулантските случаи, а самите велат дека го немаат,или можеби си чуваат скромна резерва за болнички случаи. Не знам.
Досега праксата беше лекот да го дава Инфективна клиника или некоја од Поликлиниките. Но, лекот го нема никаде: На клиниките, во болниците, во поликлинките, кај матичните лекари, во аптеките. Наводно, го има само во една аптека за која никој не кажува каде е, туку „ ако треба ќе ти нарачаат“. Така велат во некои аптеки. Лекот Тамифлу чини над 1000 денари, а пациентите си го плаќаат приватно без разлика што имаат рецепт. А, инфектолозите го пишуваат во извештаите. Зошто го прават тоа? Зошто се форсира лекот ако го нема? И како смеат да препишат сериозен лек што не може да се земе на рецепт? Кој ќе понесе одговорност од можни несакани ефекти? Но, да лекарите научија да го даваат лекот и не е нивна грижа што надлежните не го набавиле.
Се сеќавате, тоа е истиот оној лек кој државите масовно го купуваа кога се појави птичјиот грип во светот. Се чекаше ред за нарачки во компанијата која го произведува. Искрено, не знам дали и колку е ефикасен. Не сум компетента да го кажам тоа. Но, знам дека вирусот мутира. И оди сега погоди му го лекот! Сеедно! Ако веќе лекарите и надлежните велат дека Тамифлу е спасоносен лек, зошто Министерството не го набави годинава? Се заборавија, занесени со изборите? Или не знаеја која фирма да ја одберат за да го набави? Немаа време за таков потфат, грипот ги изненади.
Изминатите години лекот се набавуваше со централизирана набавка преку Министерството за здравство, а пациентите можеа да го земат од поликлиниките, од кај матичните доктори и тоа без пари со задолжителен лекарски рецепт. Сега, кога грипот доби во интензитет, Министерството остана неподготвено. Од таму им кажале на директорите сами да се снаоѓаат, да го набават лекот како знаат и умеат. И кој, како се снашол. На детска клиника набавиле мала количина, во другите клиники и болници го нема. Епилогот е тој што го гледаме.
Во 2009 та година на предлог на тогашниот премиер Никола Груевски во сред лето, во август кога нема грип, (некаде во светот имаше птичји грип) Владата одлучи да се порачаат нови 150 000 кутии од лекот Тамифлу, покрај првичните 50 000 дози. Колку набавија на крајот, колку од нив фрлија во Дрисла откога им помина рокот, само тие си знаат. Знам дека се даваа на пациентите масовно како бонбони и каде што треба и каде што не треба. На крај најголем дел од лековите завршија во буниште со поминат рок.
Исто се случи и во 2013 година. По која цена ги набавиле, колку го оштетиле буџетот на државата, колку заработила фирмата од непланските набавки, тоа треба да го кажат надлежните. Министерството за здравство тогаш беше како машина за пропаганда. Постојано кажува колку е неопходен лекот, дека треба задолжително да го земаат заболените од грип. Дополнително, тензија се создаваше со секојдневно известување за смртни случи од компликации од грип. Граѓаните беа во паника, а некој добро си го наплати тоа. Како и со вакцините против птичји грип, впрочем, кои исто така откога им помина рокот(беа огромните количини кои немаше каде да се потрошат)завршија во буниште.
И еве сега сме повторно во период кога грипот добива во интензитет, а лекарите нема како да се справат со тоа. Министерството за здравство никаде го нема. Не набавило ниту кутија од лекот. Машината за пропаганда стивна. Грипот ги изненади годинава. А, снегот?