Ако во САД судот пред неколку дена ги отфрли сите приговори на Маџар Телеком во големата корупциска афера во која е вмешана и Македонија, во Скопје наголемо се подготвува теренот кај плоштадот за изградба на хотел и на офицерскиот дом – не од било кој, ами од еден од актерите во аферата Телеком, Грчкиот милијардер Димитрис Кондаминас.
За само 630 илјади евра, Кондаминас доби актрактивно земја од над 6 илјади метри квадратни на плоштадот во Скопје каде со два објекта, домот и хотелот во барок, ќе даде свој придонес во проектот Скопје 2014.
Но, она што Кондаминас го врзува со земјава е и неговото учество во корупцискиот скандал Телеком. Шемата со корумпирани политичари и документите кои ги објавија американските институции во кои беа покренати обвиненија против инволвираните од Маџар Телеком, јасно покажуваат дека вмешаната фирма – кипарската Чаптекс Лимитед е сопственост на Димитрис Кондаминас. Обвинетите од Телеком склучувале лажни договори за консултантск услуги со Чаптекс, а потоа со тие пари се подмитувале македонските политичари и фунционери со цел да се помогне во одржувањето на монополската позиција на Телеком.
Ова е документот обезбеден од Транспаренси Интернешнл – Македонија кои до документот доаѓаат преку Кипарскиот централен регистар
А што се случуваше во Македонија? Обвинителството поведе постапка само против тројца странски државјани за аферата Телеком, директорот на македонскиот Телеком Атила Сендреј, Унгарецот Золтан Кишиус и Германецот Ролф Плат. МВР во кривичната пријава доставена до обвинителството го вклучи и Гркот Михаил Ќефајоланис кој ги правел договорите со кипарските фирми, н,о според информациите од Канал 5 од Ноември, Обвинителството не го гони Ќефајоланис.
Нема ниту едно обвинение против било кој македонски политичар од тој период кој примил поткуп. Во тоа време ВМРО ДПМНЕ е во опозиција, а СДСМ на чеко со Владо Бучковски како премиер е власт. Но, кој се се поткупувал? И што е она што за америнанското обвинителство е видливо, а за македонското невидливо? Транспарентност Интернешнл – Македонија со документите од САД и нивните истражувања на следниот линк ја илустрираат целата корупциска шема. На овој линк може да се прочита целата нивна анализа.
“Судовите во САД дадоа многу прецизни податоци и ние како Транспаренси успеавме да докажеме која личност стои зад сите фирми во Кипар преку кои се вршеле исплатите. Тоа биле лица во власта затоа што тоа токму така е и напишано во документите во САД, дури некој ги предупредил дека ако нема средства и за опозицијата нема ништо од договорот, па се обезбедиле и такви средства. Тие што тогаш биле опозиција, денеска се на власт. Тие тоа денес го заташкуваат. Очигледно е дека тој човек таму од Грција им давал на сите”, вели Тасева.
Речиси 5 милиона евра поткуп примиле македонски функционери од Телеком во тоа време за да го одржуваат подолго монополот во телекомуникациите во земјава, со што бил сериозно оштетен јавниот интерес.