Вицепремиерката задолжена за политики за добро владеење Славица Грковска денеска рече дека последните истражувања покажуваат дека сензибилитетот на граѓаните против корупцијата е зголемен, а толеранцијата намалена, што за Владата вели таа значи поголема одговорност и поттик да работи поефикасно на сузбивање на корупцијата.
„Спречувањето на корупцијата е процес во кој треба активно да бидат вклучени сите институции, МВР, Финансиската полиција, Обвинителството, ДКСК, ДЗР и сите останати институции. Бидејќи ако една од нив затаи, овој ланец не може да функционира соодветно, а процесот нема да биде ефикасен“, оцени вицепремиерката Грковска на денешната работилница за јакнење на капацитетите и имплементацијата на Конвенцијата на Обединетите Нации против корупцијата.
Во своето обраќање Грковска потенцираше дека нашата држава во борбата против корупцијата, на листата на Транспаренси Интернешнл постигна скок од 24 места, што е за поздравување, но и обврска да се работи уште повеќе подобри резултати. Таа рече дека фокусот на нејзината работа се дигиталната трансформација на општеството, транспарентност и ефикасност на институциите, како и антикорупциски политики и системски решенија.
„Ова се три области, кои навидум изгледаат различни. Но, во суштина, трите области се меѓусебно поврзани, а нивната паралелна имплементација значи обезбедување транспарентно, ефикасно и одговорно функционирање на системот“, посочи Грковска и додаде дека посебен таргет во нејзината работа е унапредување на системот на јавни набавки каде се детектирани слабости кои мора да се надминат.