Од понеделник влезот во Грција за оние кои имаат активен европски сертификат ќе биде без задолжителен тест.
Грција, од понеделник, ја укинува мерката воведена 19 декември 2021 година за задолжителен ПЦР/рапид тест и за вакцинираните и за невакцинираните патници за влез во земјата, мерка што важи и за државјаните на Северна Македонија.
Министерот за здравство Танос Плеврис истакна дека за оние кои имаат валиден европски сертификат нема да биде потребен тест за патување во Грција, јави дописничката на МИА од Атина.
„Од понеделник 7 февруари влезот во земјата за оние кои имаат активен европски сертификат ќе биде без задолжителен тест“, изјави Плеврис.
Последната министерска одлука од 24 јануари е во сила до понеделник во шест часот наутро и предвидува задолжителен негативен тест ПЦР или рапид тест за сите патници без разлика на националноста и начинот на влез во земјата и независно дали се вакцинирани или не.