Воопшто нема разлика во ставовите меѓу коалициските партнери ДУИ и ВМРО-ДПМНЕ во однос на евроинтеграциите и прашањето за името, изјави Артан Груби, шеф на кабинетот на лидерот на ДУИ Али Ахмети, за Радио Слободна Европа .
„Не верувам дека имаме разлики. Сметам дека имаме заеднички став и тоа е прокламирано и од страна на премиерот и од страна на господинот Али Ахмети, но и од страна на опозициските лидери, дека сите заеднички се залагаме да се решат кои било спорови што стојат меѓу нас и членството во НАТО и во ЕУ“, изјавил Груби.
Оваа изјава доаѓа по најавите дека врвот на ДУИ, лидерот Aли Ахмети, заедно со Mуса Џафери е во дипломатска офанзива во САД, чиј приоритет е е наоѓање решение за спорот со името и НАТО. Во исто време, министерот за евроинтеграции Фатмир Бесими пак, заминува во Атина на средба со грчкиот министер за надворешни работи Димитри Аврамопулос.
Ахмети во Белата куќа ќе разговара со потпредседателот Џо Бајден и со високи функционери во Стејт департментот, но има закажано средба и со медијатарот во спорот, Метју Нимиц.
Сепак, и покрај оваа изјава на Груби, пред заминувањето на делегцијата за САД, пратеничката Ермира Мехмети во изјава за Алсат ТВ се огради од изјавите и коментарите со антиамериканска содржина на претставници и медиуми блиски до владеачката ВМРО ДПМНЕ.
Жалиме за реториката на нашите коалициони партнери но во исто време нагласуваме дека оваа реторика не е израз на ставови на владата туку на еден од партнерите во коалицијата, изјави Ермира Мехмети.