Во рамки на дипломатската офанзива и проактивност во пресрет на Самитот на Европскиот совет, денеска во Брисел, првиот човек на Владата на Македонија, Никола Груевски, се сретна со Херман ван Ромпуј на кого му ги претстави напорите на Владата во однос на реформската агенда поврзана со Европската унија.
На средбата Ван Ромпуј покажал интерес за напорите и чекорите што ги прави Македонија во однос на евроинтеграциите, нагласувајќи дека за отворање на преговорите за членство е неопходна согласност од сите змеји-членки на Унијата, што значи дека ЕУ останува на ставот дека треба да се надмине спорот за името со Грција.
Во изјава за МИА, премиерот Груевски вели дека тој го запознал Претседателот на Европскиот совет со активните реформи и напорите за економски напредок со цел подобрување на стандардот на граѓаните во нашата земја.
– Средбата со Претседателот на Европскиот совет ја договоривме пред околу 10-15 дена и беше на наше барање. Ние сакавме да ги презентираме нашите аргументи во однос на нашиот напредок што го очекуваме во иднина. Зборувавме за реформите што ги правиме во земјата, за она што е постигнато, за проблемите со кои сме се соочувале во минатото и како истите ги решававме. Разговаравме и за оние проблеми што сега ги имаме. Се фокусирав во голем дел на многуте реформи што ги направивме, и во делот на економијата и во делот на судскиот систем и администрацијата, посебно најновиот закон што го имаме во овој дел, истакна Груевски.
Груевски ги образложил сите позначајни работи поврзани со Македонија со цел да му ја долови сликата на Ван Ромпуј за она што реално се случува во земјата.
– Да побарам негова понатамошна обврска во однос на нашите очекувања за во иднина и со надеж дека ќе се најде начин што побрзо да се надмине единствената пречка што ја имаме за следниот чекор што го очекуваме, а тоа е почеток на преговорите за полноправно членство во ЕУ, додава Груевски.
Според Премиерот, тој со првиот човек на Европскиот совет размениле мислење околу сите позначајни факти поврзани со Македонија.
– Мислам дека господинот Ван Ромпуј директно од нас доби вистинска слика за она што се случува во Македонија оти кај секој политичар овде пристигнуваат различни информации од различни страни. Ценевме дека е добро да ја слушне нашата страна, да му ги презентираме нашите аргументи, тоа го направивме, како во делот на реформите, но и во сите други области што се значајни и за кои тој пројави интерес, додава Груевски.
Портпаролот на Ван Ромпуј, Дирк Де Бакер, во разговор со дописникот на МИА од Брисел, уште пред средбата, појасни дека челникот на Советот нема да даде никаква изјава за разговорите од средбата, ниту дека ЕС ќе излезе со соопштение за деталите од истата.
Инаку, по оваа средба во Советот, премиерот Груевски замина на работен ручек со амбасадорите на земјите-членки на ЕУ на кои се очекува да им ги објасни чекорите на Владата за зачленување во Унијата и да им испрати порака дека Македонија е целосно подготвена да ги почне пристпаните преговори повеќе од било-која друга земја-кандидат и дека тој процес е главна стратешка цел на Владата на Република Македонија.