Премиерот Никола Груевски преку писмена изјава денеска реагира на насловот на написот во британскиот весник „Гардијан“, каде беше објавено дека Македонија е отворена за промена на името. Тој истакнува дека такво нешто не изјавил и оти ќе реагира до весникот.
-Такво нешто не сум изјавил. И ние ќе реагираме и до „Гардијан“. Тоа се гледа и од самиот текст каде што е очигледно дека се работи за новинарски коментар, а не за моја изјава. Тоа е кристално јасно. Вакви провокации имало и ќе има и ние сме навикнати на тоа. Очигледно темата за името станува популарна периодов точно како што претпоставувавме и вакви тенденциозни и погрешни интерпретации од многумина кои не му сакаат добро на процесот и имаат потреба од лажен ексклузивитет или одработуваат нечија агенда се очекувани, стои во писмената изјава на Груевски.
– Никола Груевски еднаш ќе се реши да каже нешто за медиум што не е под негова контрола и вистината излегува на виделина. Лажниот, виртуелен патриот, Никола Груевски, едно зборува пред граѓаните на Македонија а друго прави, задкулисно, зад грбот на граѓаните, се вели во реакцијата од СДСМ.
– Да не бил Никола Груевски изненаден од прашањето на угледниот „Гардијан“?
Или повторно има проблеми со синусите?, прашуваат од СДСМ.
Во соопштението се посочува на материјалите од прислушувањето каде како што велат од СДСМ „граѓаните дознаа дека токму Никола Груевски се пазарел со уставното име на Република Македонија и тоа тајно под маса, преку класични underground методи.
– Од објавените аудио разговори стана јасно дека Никола Груевски не само што се пазарел за уставното име на земјава туку разговарал и ги договарал дури и идентитетските прашања, се вели во соопштението од СДСМ.