Според премиерот Никола Груевски Борјан Јовановски сам си го испратил венецот кој во средата вечер беше испратен на неговата домашна адреса додека тој беше отсутен од Скопје и го нарече «мизерен». Груевски ова го изјави од митингот на ВМРО-ДПМНЕ денес во Охрид:
«Можам да кажам само една реченица. Така провидно и монструозно е тоа што самите си го направија, да човек може само да замисли на што уште се спремни овие луѓе. Па уште глумат демек лути се, па носат венец во владата, па Заев држи прес за медиумите, па завршува дека ќе имало венец на слободата и слично. И после ајде сите актери на частење, во Сорос по наградата. Каква мизерија од луѓе», рече тој.
Груевски уверува дека настанот во Гошинце е сериозен:
“Во него учествувала група учесници, чиј идентитет веќе е познат на нашите институции и за што е известена меѓународната заедница и институциите во Косово. Предизвици на овој план веројатно ќе продолжат, ова не смее да се става во дневно политички контекст”, рече тој.
Потоа додаде дека опозицијата несе “кукавички јајца” кога вели дека власта стои зад нападот во Гошинце: “Да ви кажам искрено ми се гади од таа антидржавна реторика и од целиот тој ланец на настани, што не е ни чудно што многумина ги потсетува со оној од 2001-вата. Но сакам да им порачам една работа на сите инволвирани, ова не е 2001-вата, институциите ќе делуваат решително и одлучно во рамки на своите надлежности, а потпалувачите од петата колона треба максимално одговорно да се постават во случајов, зашто ова веќе не е дневна политика и нивните глупости, напади, закани, клевети и однесувања за овој случај имаат еден друг контекст. Ова е сериозна работа и во прашање е државата. Изјавите на лидерот на опозицијата на неговата последна прес конференција во врска со овој настан ќе ги земам како израз на неговиот капацитет, но и неинформираност и ќе апелирам на воздржаност, ако воопшто е можна кај овие луѓе, затоа што воопшто не е наивна ова работа и без разлика на личните моменти, омразата која ја имаат, фрустрациите, комплексите кај опозицијата, за ова замолувам да се воздржат од шпекулации и да се надминат”, вели Груевски.