Премиерот Никола Груевски во денешното излагање пред Собранието на Република Македонија каде го образложуваше изборот на новите министри, зборувајќи за оставката на министерот за образование Панче Кралев се судри во ставовите со пратеникот Ивон Величковски.
“Панче Кралев успешно ја извршуваше функцијата и се справи со многу проекти, како на пример екстерното тестирање, една круцијална реформа со успех. Во разговор со него, тој се согласи да работи како мој советник за прашања врзани со образованието и економијата”, рече премиерот на собраниската говорница.
Величковски реагираше на фалбите на премиерот за успехот на Кралев како министер.
“Она што вие го правите е обид да го анулирате неуспехот на министерот Панче Кралев и проекто екстерно тестирање”, реагираше пратеникот од ЛП Ивон Величковски.
Премиерот на ова реплицираше тврдејќи дека екстерното тестирање е огромен успех, кој со исклучок на некои ситни проблеми се одвивал непречено.
“Не се согласувам, токму овој проект е еден од најуспешните проекти кој господинот Панче Кралев го подготови, а кој со сосема ситни проблеми ваму – таму, главно се одвива одлично”,рече Груевски.
Екстерното тестирање помина проследено со протести од страна на дел од учениците и родителите, а на денот на самото тестирање во многу училишта системот падна и тестирањето не можеше да се одржи.