Постојат четири причини зошто ЕУ не треба повеќе да чека и да го одлага почетокот на преговорите за членство на Македонија: таа треба да биде катализатор на спорот за името, да ја почитува пресудата од Судот на правдата во Хаг, да покаже почит кон нашите реформи и економскиот успех на земјата.
Ова се поентите на премиерот Никола Груевски кој тој ги изнесе синоќа во Брисел на конференцијата во Фондацијата Конрад Аденауер откако во текот на денот вчера беше на разговор кај претседателот на ЕУ Херман Ван Ромпеј каде што освен односите со Грција и Бугарија станало збор и за 24 декември минатата година и настаните во Собранието. Според Груевски ситуацијата во Собранието е нормализирана. Тој се надева дека истражната комисија ќе ја заврши работата и дека донесувањето на новиот буџет ќе се одвива нормално. “Нема да ги има настаните од минатата година”, рече Груевски.
Средбата кај Ван Ромпеј дојде на само неколку дена пред самитот на ЕУ на кој ќе се разговара за проширувањето и извештајот на Европската комисија (ЕК) за балканските земји. Оттука и прашањето на НОВА за тоа дали Ван Ромпеј покажал намера да и помогне на Македонија да стаса до преговори со ЕУ и да го реши спорот со Атина.
Според премиерот, првиот човек на ЕУ би сакал да може да го реши проблемот но тој има ограничени можности во тој домен. “Доколку овој проблем беше во негови раце побрзо ќе стасавме до преговори”, рече Груевски.
Груевски смета дека во Грција недостасува “европски шмек” во нејзиното оденесување со Македонија која одбива директен дијалог со нашата земја. “Ние бараме јасна визија од Брисел”, рече Груевски. Тој е уверен дека и ние и Грција сме во неудобна позиција. Затоа што Македонија исполни доволен степен на критериумите од Копенхаген но сепак не доаѓаме до консензусот што води до преговори. Грција е постојано во опозиција има различни оправдувања како територијални барања, идентитетот, недостиг на добра волја кои и недостасуваат на Македонија, вели Груевски.
Тој исто така смета дека постои за Грција законска обврска за почитување на одлуката на судот од Хаг каде што Македонија го доби спорот. “Тоа ја оправдува нашата позиција и соседот нема право да блокира”, вели премиерот. И ЕУ, според Груевски, не ја почитува пресудата од Хаг. “Се прашувам зошто имаме пресуда кога никој не ја почитува”, се запраша премиерот.
Со доза жалење Груевски кажа дека со поранешниот грчки премиер Јоргос Папандреу, во текот на повеќето средби што ги имаа, биле најдени решенија за повеќе точки. “Не најдовме решение за се но за некои точки да но потоа дојде нова влада со која немаме таква комуникација”, вели шефот на владата.
НОВА го запраша исто така премиерот дали наскоро има намера да ја открие сумата за владиното рекламирање во медиумите. Груевски одговори дека медиумите не биле тема на неговиот разговор во Ван Ромпеј во Брисел.