Премиерот Никола Груевски го нападна неговиот грчки колега Антони Самарас тврдејќи дека тој игра на картата на национализам. Тој вели дека грчкиот премиер саката „да ја торпедира“ Македонија во приближувањето кон ЕУ.
„Тој е творец на проблемите. Тој во 1991 заедно со тогашниот премиер Константин Мицотакис оваа тема ја стави на тапет, пред тоа немаше спор околу името. Самарас својата целокупна кариера ја изгради на националистичка реторика и конфликт со Македонија“, го критикува Груевски својот колега во интервју за виенскиот дневник „Пресе“.
Тој додава дека како министер за култура Самарас во 2008 грчката стратегија ја објасни на начин дека Атина мора да го одложи решението се додека Македонија не се распадне и не биде апсорбирана од своите соседи, пренесува српскиот портал B92.
Денеска според неговите зборови, Самарас користи поинаков речник, но неговите ставови останаа непроменети.
Прашан дали тоа значи дека нема компромис се додека Самарас е на власт, премиерот Груевски во интервјуто за виенски „Пресе“ одговара дека во тој случај Македонија ќе мора да ги прифати сите Грчки барања, што не е компромис.
На прашањето кога очекува почеток за пристапни преговори со ЕУ, Груевски вели дека е тоа едно од најтешките прашања.
„Соочени сме со фактот дека немаше никакви директни преговори веќе една и пол година, и тоа заради тоа што другата страна не сака да разговара за решавање на спорот за името. Климата е многу влошена со доаѓањето на власт на новата грчка влада кон средината на 2012. Јас чувствувам дека другата страна не сака компромис,“ објаснува тој.