Премиерот Никола Груевски денеска го повика СДСМ да даде предлог за претседател на Комисијата за настаните во Собранието на 24 декември лани, а за кој, како што рече, ќе се реши со разумен заеднички консензус.
Тој посочи дека нерешавањето на прашањето со Комисијата, како што се зборува на состаноците во Брисел, било дискутабилно за натамошните чекори кон ЕУ. Според него, прашањето со Комисијата не било решено бидејќи СДСМ не го сака тоа.
– Како политичка партија направивме многу обиди да го одоброволиме СДСМ да се избере претседател на комисијата. Предложивме многу луѓе и сите беа одбиени. На крајот прифативме да биде од СДСМ, но да се одлучи со консензус. Го одбија и тоа. Потоа ја прифативме иницијативата на претседателот Иванов за претседателот на МАНУ да биде на чело на таа комисија, го одбија и тоа со некои нелогични образложенија.
– На крајот сфативме дека во оваа партија им е многу поважно што и како ќе се случува околу конгресот и Бранко Црвенковски, односно многу поважен им е Бранко Црвенковски отколку Република Македонија, изјави премиерот Груевски денеска одговорајќи на новинарски прашања по присуството на традиционалниот деловен појадок со бизнис заедницата.