Коалицијата „За подобра Македонија“ предводена од ВМРО-ДПМНЕ, синоќа одржа митинг во Прилеп.
Обраќајќи им се на присутните во спортската арена „Сонце“, претседателот на ВМРО-ДПМНЕ Никола Груевски рече дека на овие избори партијата излегла со најдобро осмислената програма во досегашната историја на Република Македонија. И не само тоа туку, како што истакна Груевски, ВМРО-ДПМНЕ ја имала една од најдобрите програми во југоисточна Европа што било која партија досега ја направила.
Груевски смета дека на 27 април опозицијата ја очекува лавина од гласање за ВМРО-ДПМНЕ и за Ѓорге Иванов.
„Ако ова беше стечај, на 27 април ќе биде ликвидација. На Заев му е јасно дека бројката ќе биде многу поголема. Нему му е јасно дека ВМРО-ДПМНЕ е на чекор до 62 пратеника. Само малку ни недостасува, еден чекор. Затоа е таа нервоза, затоа е сега влегувањето во ново сценарио на клеветење, на манипулирање, на оцрнување“, рече Груевски.
Како еден од поголемите успеси во времето на неговото владеење, тој го смета намалувањето на стапката на невработеност од 38% на 28%, што се должело на новоотворените 120.000 работни места. Според претседателот на ВМРО-ДПМНЕ, во следните 4 години планирано било отворање на нови 64.000 работни места, со што невработеноста ќе била сведена на 22%.
На присутните приврзаници на ВМРО-ДПМНЕ и коалицијата, Груевски им ја соопшти веста дека, веднаш после изборите, ќе биде потпишан договорот за стратешко партнерство помеѓу прилепскиот Тутунски Комбинат и Филип Морис.
Стратешкото партнерство ќе се реализирало преку формирање на ново Друштво со ограничена одговорност, во кое Филип Морис ќе имал 51%, а Тутунски Комбинат 49% учество во капиталот. Новоформираното друштво ќе било одговорно за производство, дистрибуција и продажба на брендовите од заедничкото портфолио на домашниот пазар.
Како што истакна претседателот на ВМРО-ДПМНЕ, со договорот дополнително се обезбедувало и производство на поголеми количини ориентален тутун за потребите на Филип Морис, како и дополнителни средства за инвестиции, осовременување на производството и подобрување на продуктивноста на комбинатот.
Посебно порака Груевски упати до граѓаните кои не излегле да гласаат во првиот круг на претседателските избори, до неопределените, до оние кои сѐ уште не одлучиле кому да го дадат својот глас, како и до сите кои имаат намера да гласаат за помалите партии, велејќи дека гласот даден за нив, бил залудно потрошен глас.
Кандидатот за претседател Ѓорге Иванов, рече дека во неделата граѓаните го поддржале неговиот јасен концепт.
„Покажавме дека имаме чувство за државност, дека си ја сакаме државата. Македонија има успешна надворешна политика, за што говорат петте позитивни извештаи и петте препораки за почеток на преговорите со ЕУ“, потенцираше Иванов.
На митингот говореше и носителот на кандидатската листа за пратеници во ИЕ 4, Зоран Ставревски, кој рече дека од проектот за еднократен отпис на долговите, корист ќе имале 50.000 семејства.