Салдото на Јавниот Долг на Централната влада од 34,3% ја одразува реалноста во однос на задолжувањата, но време е истите да запрат, ова се поентите од интервјуто кое Богов го даде за телевизијата 24Вести во емисијата „Тренд“ со Анета Додевска. Во продолжение пренесуваме дел од разговорот помеѓу Додевска и Богов.
– Според Вас, кое е оптималното ниво на одржливост на Јавниот долг за да можеме да проектираме дека навреме ќе ги сервисираме, односно отплаќаме сите долгови кон дома и кон странство?
Богов: Треба да се биде внимателен. Треба да го земеме примерот со некои земји од опкружувањето кои што имаат долг на Централна Влада од 50% и веќе се соочуваат со проблеми. Ние имавме простор и дојдовме до ниво од 34% Јавен долг на Централната Влада. Можеби имаме уште мал простор за задолжување, но меѓутоа, треба веќе да застануваме и да ја консолидираме буџетската сметка и буџетскиот дефицит веќе треба да го сведуваме на ниво кое што нема доплнително да го зголемува долгот на Централната Влада.
– Колку и како изборите влијаат врз вкупната економска клима?
Богов: Се зависи од политичките актери. Ако тие се придржуваат на правилата на игра, ако имаме една нормална и цивилизирана атмосфера, тогаш нема да бидат заплашени инвеститорите и нема да бидата заплашени и бизнисмените. Но ако тука имаме некои поголеми тензии, секако дека тоа негативно влијае врз тековните, односно постоечките бизнисмени а секако и врз потенцијалните од странство.
Целосното интервју на гувернерот Димитар Богов, во кое зборува и за окрупнивања и спојувања во банкарскиот бизнис, ќе се емитува во недела на 24 Вести.