Специјалниот претставник на Германија за Македонија, Јоханес Хајндл вели има излез од политичката криза, а тој е содржан во Договорот од Пржино, за кој пак вели е блокиран и кризата продолжува да трае додека времето истекува.
– Договорот од Пржино треба да се реафирмира бидејќи обезбедува рамка за процесот на реформи важни за наоѓање излез од кризата и за напредок во евро-атланските интеграции на земјата, порача Хајндл.
Хајндл ја поздрави одлуката на претседателот за целосно поништување на аболицијата, додавајќи дека тоа ќе овозможи фокус на оние прашања што се клучни за иднината на земјата.
Амбасадорот Хајндл посочи три точки важни да се спроведат без одложување.
– Прво, партиите треба да се договорат за датум за изборите и да го направат тоа што е потребно за спроведување слободни и фер избори. На Специјалното јавно обвинителство мора да му биде овозможено да работи без опструкции и партиите мора да се договорат без одложување за спроведување на реформите нотирани во извештајот на Прибе. Потребно е лидерите на партиите да го стават интересот на земјата на прво место и да ги спроведат потребните реформи, дополни Хајндл.
Тој потенцираше дека сега има позитивна атмосфера за надминување на кризата, и повика истата да биде искористена.
Како и претходно, Германецот не одговараше на новинарски прашања. Рече дека разговорите со лидерите на четирите политички партии, со претседателот Ѓорге Иванов и со министерот за надворешни работи Никола Попоски завршиле продуктивно.