Претседателскиот кандидат на ДПА Илјаз Халими посети неколку гостиварски села а синоќа одржа предизборен митинг во гостиварско Речане каде ја промовираше својата изборна програма и се фокусираше на важноста на масовното излегување на овие избори, како што рече, за да ги движиме работите напред.
Имав можност да посетам неколку села и да се сретнам со многу граѓани и сите ми се пожалија дека живеат во лоши услови,каде што нема вода,инфраструктура,и каде што немаат каде да го продаваат тутунот. Ако ја добијам вашата подршка сите овие проблеми што ги создаде Али Ахмети ќе бидат елиминирани – истакна Илјаз Халими.
Тој вети дека ако победи на овие избори ќе обезбеди подобра перспектива за младите и посигурна иднина.
Лидерот на ДПА Мендух Тачи остро ги критикува политичките противници од ДУИ, за, како што рече, тешката состојба во државата.
Ги оставија луѓето без вода, канализација, без перспектива. Лажат дека го легализираа албанскиот јазик. За таа работа се потребни 440 милиони евра, а тие пари ни во сон не можат да ги видат – истакна Тачи.
Зборувајќи за важноста на претстојните избори Тачи побара масовна подршка за, како што рече, со тоа половината од работата ќе биде завршена и тој ќе стане потпредсетател на идната Влада.