Луис Хамилтон е нов лидер во Формула 1 шампионатот во оваа сезона. По вчерашната пол-позиција, 69 во кариерата, британскиот возач на Мекларен го комплетира успешниот викенд во Италија со денешниот триумф на патеката во Монца и го симна Себастијан Фетел од првото место во генералниот пласман. До шестата победа во 2017 година, вкупно 59 во неговото досие, стигна со време од 1:15:32,312 часа. Второто место го освои Валтери Ботас (+4,471 секунди), трет низ целта мина германскиот пилот на Ферари (+36,317 секунди).
„Ја обожувам оваа патека во Монца и страста на фановите. Посебно оние на Ферари. Енергијата што е присутна овде можете да ја почувствувате само уште во Силверстон. Презадоволен сум од настапот. Сите во тимот, без исклучок, завршивме одлична работа, се функционираше беспрекорно овој викенд. Мерцедес има помоќен мотор од Ферари“, рече Хамилтон по четвртата победа во италијанското гранпри, последно на европскиот континент за оваа сезона.
Пофални зборови за болидот на Мерцедес и за луѓето во боксот на тимот од Брекли во Велика Британија искажа и Финецот Валтери Ботас кој, исто така, заврши одлична работа на патеката. Тргна со проблеми, беше претекнат од Кими Раиконен уште на стартот, но подоцна ги презеде конците во свои раце и на крајот успеа да се пробие до подиумот.
„Имав непријатен почеток. Ја загубив позицијата, па морав да наведнам глава, да работам и чекор по чекор да ја вратам. Болидот одлично ме слушаше и служеше. Неверојатно е колку бевме брзи денеска. Ова е совршен резултат за екипата“, истакна моментно третопласираниот во генералниот пласман, Ботас.
Фетел ја опиша трката како забавна и покрај освоеното трето место. Германецот не очајуваше премногу за пласманот и за загубеното прво место во севкупниот редослед. Истакна дека очекува неизвесност до крај на сезоната и дека и тој и неговиот болид ќе бидат конкурентни за шампионската титула во преостанатите седум трки (Сингапур, Малезија, Јапонија, САД, Мексико, Бразил и Абу Даби).
„Стартот не ми беше најдобар, а ми требаше и време да стекнам доверба во болидот. Го немавме темпото на водечките двајца, но беше извонредно чувството од поддршката што ја имавме крај патеката. Иако трката беше тешка и заврши како што заврши, свесни сме дека поседуваме многу силни машини и ќе бидеме силни до крај на сезоната“, порача Фетел кој досега во сезоната собра 235 бода, три помалку од Хамилтон.
Четврти во Монца беше Австралиецот од тимот на Ред Бул, Даниел Рикардо, петти беше вториот пилот на Ферари, Кими Раиконен. Бодови освоија уште Естебан Окон, Ленс Строл, Фелипе Маса, Серџо Перез и Макс Ферстапен. Трката не ја завршија Фернандо Алонсо (Мекларен Хонда), Маркус Ериксон (Заубер Ферари), Стофел Вандорн (Мекларен Хонда) и Џолион Палмер (Рено).
Наредната трка во Ф1 шампионатот е на 17 септември во Малезија.
Резултати од трката во Монца за ГН на Италија
Луис Хамилтон (В. Британија/Мерцедес) 1:15:32,312 часа
Валтери Ботас (Финска/Мерцедес) +4,471 сек.
Себастијан Фетел (Германија/Ферари) +36,317 сек.
Даниел Рикардо (Австралија/Ред Бул) +40,335 сек.
Кими Раиконен (Финска/Ферари) +60,082 сек.
Естебан Окон (Франција/Форс Индија) +71,528 сек.
Ленс Строл (Канада/Вилијамс Мерцедес) +74,156 сек.
Фелипе Маса (Бразил/Вилијамс Мерцедес) +74,834 сек.
Серџо Перез (Мексико/Форс Индија) +75,276 сек.
Макс Ферстапен (Холандија/Ред Бул) +1 круг, итн.
Генерален пласман кај возачи
Луис Хамилтон 238 бода
Себастијан Фетел 235
Валтери Ботас 197
Даниел Рикардо 144
Кими Раиконен 138
Макс Ферстапен 68
Серџо Перез 58
Естебан Окон 55
Карлос Сајнц 36
Нико Хулкенберг 34, итн.
Генерален пласман кај конструктори
Мерцедес 435 бода
Ферари 373
Ред Бул 212
Форс Индија 113
Вилијамс Мерцедес 55
Торо Росо 40
Хас Ферари 35
Рено 34
Мекларен Хонда 11
Заубер Ферари 5