Иранскиот врховен водач ајатолахот Али Хамнеи во говорот кој директно го пренесуваше државната телевизија по повод завршните свечености за рамазан предупреди на можноста од избувнување граѓанска војна во Египет.
„Не загрижуваат настаните во Египет. Можноста од граѓанска војна со секој ден е поголема. Тоа е катастрофа”, рече ајатолахот Али Хамнеи. Побара од египетскиот народ, од политичките и верските лидери и од интелектуалците да ја разгледаат опасноста од продолжувањето на таквата ситуација.
Покрај тоа, иранскиот врховен лидер ги осуди масакрите врз населението и употребата на сила, и се изјасни против вмешувањето на странските држави во решавањето на проблемите во Египет. „Им советувам на египетските елити да не им дозволат на странските држави да се вмешаат во египетската ситуација”, додаде Хамнеи ненаведувајќи конкретно ниедна држава.
Според ајатолахот Хамнеи, доколку во Египет избие граѓанска војна, ништо нема да може потоа да ја сопре. Техеран и Каиро, инаку немаат меѓусебни дипломатски односи повеќе до 30 години, пренесува макфакс.
Хамнеи, исто така, ги осуди израелско-палестинските мировни преговори и оцени дека тие може да бидат на штета на Палестинците. „Она што го подготвиле насилниците (САД) во тие преговори е на штета на Палестинците. Исламскиот свет мора да ги осуди узурпаторските акции на ционистичките (израелски) диви волци и нивните заштитници”, рече Ајатолахот.
„Тие преговори не би смееле да завршат со уште поголема неправда кон палестинскиот народ и изолација на палестинските муслимански борци”, рече ајатолахот Хамнеи.