Еврокомесарот за проширување и соседска политика, Јоханес Хан, денеска заедно со европратениците Едвард Кукан, Иво Вајгл и Ричард Ховит ќе се обиде да ги помести преговорите од мртва точка и да издејствува наоѓање крајно решение за политичката криза во Македонија.
За време на посетата, Хан и европратеничката тројка, како што соопштија од Европската комисија, ќе имаат одделни средби со лидерите на политичките партии, а потоа ќе се одржи заедничка лидерска средба.
Основа за постигнувањето конечно решение би бил договорот од 2 јуни.
Посетата на Хан и на тројката олеснувачи од Европскиот парламент доаѓа еден ден по посетата на помошничката на американскиот државен секретар, Викторија Нуланд, која соопшти дека се останати неколку нерешени прашања и изрази надеж дека наскоро ќе се реши политичката криза.
– Се надеваме дека утре ќе биде многу, многу добар ден и дека сите ќе седнат на маса подготвени да го финализираат договорот. Тоа е во најдобар интерес на Македонија и во интерес на силна трансатлантска траекторија на вашата земја – изјави Нуланд во интервју за телевизијата „Алсат-М“.
Еврокомесарот хан вчера на својот профил на Твитер напиша дека ова се клучните моменти за излез од политичката криза.
„За моето патување во Поранешната југословенска република Македонија: Клучни моменти за водачите да се согласат за излезот од политичката криза“, напиша на својот Твитер-профил еврокомесарот Јоханес Хан.
"On my way to former Yugoslav Republic of #Macedonia: #Crucial #moment for leaders to agree on way out of political crisis".
— Johannes Hahn (@JHahnEU) July 13, 2015