Утринава еврокомесарот за проширување Јоханес Хан ги започна поединечните билатерални средби со преговарачките тимови на најголемите политички партии во земјава- потписнички на Договорот од Пржино.
Во моментов во резиденцијата на Европската Унија во Пржино пристигна претседателот на владејачката партија Никола Груевски заедно со координаторот на пратеничката група на ВМРО-ДПМНЕ Илија Димовски, министерот за финансии Зоран Ставрески, министерот за надворешни работи Никола Попоски, министерот за здравство Никола Тодоров и шефот на кабинетот на досегашниот премиер Мартин Протуѓер.
Хан претходно оствари средба во врвот на опозицијата, односно лидерот на СДСМ – Зоран Заев, потпретседателката Радмила Шекеринска и Оливер Спасовски.
По завршувањето на средбата, Заев кратко пред новинарите рече дека е рано да се даваат какви било прецизни изјави, бидејќи според него императив на Договорот се медиумите и прочистувањето на Избирачкиот список.
.jpg)
Во текот на денот Хан ќе оствари и заедничка средба со претставниците на четирите најголеми политички партии. Тој кусо за новинарите изјави дека се надева оти денот ќе биде добар.
Заедно со доаѓањето на Хан, премиерот денеска ја депонира својата оставка до Собранието со услов „сто дена пред избори“. Вчера продолжија и преговорите на партиските работни групи со посредникот Ванхауте и во делот за медиуми.
Засега останува блокирана Анкетната Комисија за скандалот со прислушувњето, а се уште „виси“ и Избирачкиот список, како точки предвидени во Договорот од Пржино. Се очекува во текот на денот да се дефинира и точниот датум за одржувањето на предвремените парламентарни избори.