Советот за безбедност на ОН, за вечерва во 21 часот по средноевропско време закажа вонредна седница по повод ситуацијата во Сирија, откако Сириската главна опозициска група, соопшти дека во денешниот напад на силите на режимот на Асад со хемиско оружје во околината на Дамаск, убиени се повеќе од 650 лица, што сириската влада категорично ги демантираше.
Сириската Опсерваторија за заштита на човековите права, со седиште во Британија, соопшти дека 100 лица загинале, но не коментираше дека во нападот бил користен гас.
Активистите наведоа дека боеви отрови се употребени во предградијата Аин Тарма, Замалка и Џобар во регионот Гута. Наводно, меѓу загинатите има многу жени и деца.
Владата на Дамаск негираше дека воопшто имало било какви напади, јавуваат светските агенции.
Обидувајќи се да истражат што се случило во областа Гута, новинарите на неколку новински агенции успеале да стапат во контакт со жителите на неколку села, кои тврдат дека не слушнале за било каков напад со боеви отрови, но дека во текот на денот од неколку правци се слушале жестоки пукотници.
Местото на кое наводно се случил нападот, е под контрола на исламистите од организацијата Џабат ал Нусра, чија положба веќе цел месец е под сериозен притисок на сириската војска.
Џабат ал Нусра е една од групите на сириските бунтовници, на која и се припишуваат цврсти врски со Ал Каеда.