Хелсиншкиот комитет за човекови права на РМ предупредува дека денешниот напад врз новинарската екипа на порталот НОВА ТВ додека известуваше од местото на собирање потписи пред трговскиот центар „Бисер“ во скопската општина Аеродром во организација на иницијативата „Излези и ти“ е потврда дека оваа иницијатива „со своите постапки многу лесно може да доведе до разгорување на говорот на омраза, имајќи во предвид дека ваквиот говор врз основа на етничка припадност и статус на бегалец е веќе широко распространет во Македонија“.
-Како што сме посведочиле во минатото, ваквото разгорување на говорот на омраза неизбежно води кон насилство и други кривични дела од омраза кои се исклучително опасни и разорувачки за сите општества, особено за мултиетничко и мултикултурно општество како нашето, се вели во соопштението.
Според Хелсиншкиот комитет лицата кои денеска физички ја нападнаа новинарската екипа се претпоставува дека се организатори или тесно поврзани со организаторите на инцијативата.
-Во таа смисла, упатуваме на тоа дека правото на собирање на граѓаните и реализацијата на граѓанските иницијативи од каква било природа во никој случај не смее да се остварува на начин со кој се загрозува остварувањето на слободата на информирање на граѓаните, односно слободата на известување на новинарите и медиумите, велат од Хелсиншки.
Тие апелираа до Министерството за внатрешни работи итно да го испита нападот на новинарската екипа, но и блиску да го следи развојот на собирањето потписи низ државата бидејќи сметаме дека тие организирани настани претставуваат безбедносен ризик што кулминираше и во денешниот говор на омраза изразен и вообличен во инцидентот во општина Аеродром. Посочуваат и дека и Владата на РМ со „Планот 369″ за итни реформски приоритети, си зема за обврска да ги расчисти случаите на напади извршени врз новинари.
– Неспорно е дека граѓанските иницијативи мора да бидат дозволени и непопречувани од страна на државните органи, но ниту една граѓанска иницијатива не смее да биде поставена врз дискриминирачка основа кон одредени ранливи групи граѓани, без оглед дали се тие македонски државјани или странци, ниту пак смее да се служи со антигонизирачки и дискриминирачки јазик насочен кон ранливите групи во општеството какви што се бегалците од завојуваните подрачја во Сирија и околните земји.
Досегашното дејствување на оваа граѓанска иницијатива оди на линија на газење по темелните права и отворена дискриминација кон бегалците, и се повикува на непроверени информации и тенденциозни шпекулации кои немаат допир со реалната фактичка состојба, но кои можат да влијаат особено деструктивно од аспект на разгорувањето на говорот и насилството од омраза, се вели во соопштението од Хелсиншкиот комитет за човекови права.